金融High Tea——大股反彈 鑊氣未足

        中美兩國上周五起先後互徵關稅,兩國埋身肉搏之際,喺角力中採取主動的美國,在過去兩日無乜動作,大市因而反彈,升幅主要係由大股帶動,三、四線股份唔係咁活躍,反映市場氣氛仍然審慎。

  過去兩日中美暫時算係西線無戰事,上周指數大跌,可能有啲淡友食胡平倉,帶動指數回升,主力係升啲大股好似內銀咁,跌得少的大股好似公用股、太古A(019)相對無乜進帳,炒股亦無乜鑊氣,睇到市場都唔係咁有進攻氣氛。大市升372點,成交991億,扣除新上市的小米(1810)的77億成交,大市成交900億多少少,資金未係咁足。

  首隻同股不同權股份小米昨日掛牌,佢招股撞正中美貿易摩擦最熱時,各路投資者都縮縮先。昨日首掛就好彩啲,遇上大市反彈,股份一開都係破咗17元招股價,但幅度無先前講跌5%以至一成咁誇張,首掛收報16.8元,較上市價17元跌0.2元或1.2%。

  雖然係咁,若然用孖展申請中到成手係,要蝕本減磅都幾傷,呢個亦係用槓桿買新股的最大風險。通常掛牌熱炒新股份,融資成本已經食咗一截升幅,若然撞正估計錯誤,中咗成手貨。

  雖然融資成本平均無咁多,但輸股價要止蝕,咁幾舖賺埋可能一次就被人繳械,所以孖展打新只宜喺個市暢旺之時,在反覆市況認購新股就要加倍小心。

小米5G平台概念無發揮

  小米首掛破底,董事長雷軍派定心丸,話長遠對公司有信心,又話表現比想像好,認為外面對佢有誤解。

  有中環茶友直言,呢啲講法真係唔係幾啱聽,今次茶友無抽新股,理由有兩個,最主要係佢覺得市況波動,就算想入貨,寧願等佢掛牌睇清楚啲,就算買貴小小,都好過綁住啲資金。二係佢覺得小米招股過程,搞來搞去搞唔出一個令人有興趣的概念,加上臨門一腳增發股份畀創辦人,成個招股就無咗推動力。

  茶友話,小米賣手機無錢賺,雷軍喺上市儀式話,公司以互聯網概念做手機,意思似乎係話蝕頭賺尾,旨在日後食大茶飯。

  雷軍所講的互聯網概念,其實就係5G概念,賣點係屆時網絡速度再快,帶來更多生活便利,大大增加網上商機,小米蝕做手機平價狂推,就係要搶一大班客,佔入門接口。

  換言之,小米係希望透過賣手機,打造一個好似facebook等互網網巨頭的用戶平台概念。未來呢個平台概念唔可以話無古仔,可惜係講唔到出嚟,而且中美貿易其中一個最大摩擦點,正係5G發展,小米唔知係咪因此唔敢力推,加上管理層喺商業營運執行力未有往績,於是搞到招股有啲溫吞水,就算大平賣都仲要破發。

  小米平價上市,未來表現要睇內地科技股宏觀表現,同埋外界對小米團隊執行力有幾大信心,講到尾小米掛牌前都無乜賺過大錢,股價表現好壞都係要講個信字。

中糧包裝飲涼茶嗆親

  反彈市恒指一度升過500點,收報28688點,升372點;國企指數收報10768點,漲145點,成交987億元。內銀股普遍造好,建行(939)除淨,股價漲2%,收報6.94元;工行(1398)升1.5%,收報5.61元;中行(3988)升0.5%,收報3.69元。藍籌表現最好係銀娛(027)急升5%,收報60.45元;其次是金沙中國(1928)收升4.3%,報41.05元。其他濠賭股同樣向好,澳博(880)大升9.7%,收報9.43元;新濠國際(200)漲近7%,收報22.3元;永利澳門(1128)升4.6%,收報23.95元。其他藍籌有好表現係吉利汽車(175),急升3.2%,收報19.92元。

  升市中三線股中糧包裝(906)大插25%,收報3.54元,主要係公司去年與王老吉公司、智首及清遠加多寶草本簽定增資協議,但王老吉一直未按協議注入加多寶商標,作為實物出資承諾,中糧包裝日前向香港國際仲裁中心提出仲裁申請,市場擔心糾紛影響,令股份大跌。王老吉係內地好有價值的飲料品牌,但過往都有知識產權糾紛,今次合作結果又係麻麻煩煩,不過,中糧包裝有國企背景,插到呢個位,相信好大程度反映咗不明朗因素。中糧包裝股價大跌後發聲明,強調仲裁係有充份合同和法律依據,以保護集團及股東合法權益,估計事件對公司營運影響有限。

陸羽仁

hd