金融High Tea——小米讓利之謎

        美股抗跌力真係唔到你唔服,中港股市因為貿易戰大插,華爾街就當佢小菜一碟,早兩日象徵調整一陣已經回升,前晚再喺銀行股帶動下勁升320點,收報24776點,科技股表現強勁,可以話係新舊經濟股雙炮齊響。

  美股向好,主要係銀行預期業績理想,加上減稅效應推動,傳統股份佔比較高的杜指,跑贏科技股主導的納指,但咁唔代表科技股唔得,facebook月前受通俄門事件影響,當影響丟淡,佢嘅股價就節節向上。

  同美股相比,港股就明顯弱勢,甚至A股造好升0.4%,但港股仍係先升後跌,收市倒跌6點,收報28682點;國企指數收報10824點,漲56點,成交金額987億元。美國科技股造好,小米集團(1810)上水,但騰訊同樣先升後跌,收跌2.3%,報386.8元,單計騰訊跌幅拖低恒指70點,成為大市下跌主因。

股價上水急升13%

  昨日最搶鏡係第二日掛牌的小米,股價不但上番水面,而且仲急升13%,收報19元。小米以銷售手機為主要業務,但公司提出的概念係互聯網業務,呢個概念喺招股時吸引唔到股民入飛,但有券商就喺佢掛牌後唱好。麥格理發表報告,首次給予小米「跑贏大市」評級,目標價高至30元,較現價有逾60%上升空間,相當於2019年預測市盈率35倍。

  該行認為,小米用戶量是收入主要動力,可透過互聯網服務,包括廣告、網上遊戲帶動收入,而時尚手機對用戶有吸引力。這種商業模式跑贏其他手機同業,料互聯網服務毛利貢獻,未來三年將提升至42至49%。

  大行唱好小米互聯網概念,但呢樣嘢唔係乜新招,點解喺上市前發揮唔到效果,掛牌後大行先好似發現新大陸,成為炒高股價理由呢?內媒就提出咗另一個剖析小米估值觀點,就係今次佢以下限價上市,是向基金「讓利」。

  據引述在小米上市前夕,京東集團董事局主席劉強東在微頭條發文稱,奉勸有意跟住上市的獨角獸(市值10億美元仍未上市的創新公司)向雷軍學習,做到讓股民賺錢。他認為去股市割禾青的,沒有資格成為企業家。看到雷軍最後定價在最低價位,劉強東加了一個註釋,前幾年資本氾濫,很多創業公司享受超高一級市場估值,給很多創業者造成假像,有的人甚至真的相信自己可以值這麼多錢,現在可能到了裸泳時候。

京東主席拆解定價玄機

  劉強東是內地科企高層,對行內大戶動向應有了解。按他的解讀,過去獨角獸自以為身價過人,而且愈叫愈貴,但到要真金白銀籌錢時,其實一樣面對爭奪資本現實。

  未來香港上市的優質科企陸續有來,喺供應大增下,價錢自然有壓力,劉強東指,「小米讓利」說法和奉勸往後想上市的獨角獸,抬高身價要小心被迫裸泳,正係反映咗呢個大勢。

  對於劉強東或內媒說小米讓利解釋,其實還有多一點觀察,就係小米董事長雷軍喺上市儀式,雖然有提吓入飛支持者,但實際要叩頭致謝的,是做基礎投資者的大戶李嘉誠、馬雲、馬化騰等大佬認購小米股票,強調「這是對小米管理層和員工莫大信任和重托。」雷軍提到這幾個大戶,相信喺上星期貿戰風高浪急時,決定小米能否上市關鍵,只要佢哋抽飛,相信掛牌就有機會觸礁,所以雷軍喺儀式裏面,流露感激不已的神情。

  呢幾個大戶都係投資聖手,亦是對科網公司價值有深刻認識的強手,佢哋投資機會多不勝數,喺咁波動嘅市況要佢哋投資,「讓利」可以話係最體面說法。正如喺金融海嘯時期,好多大公司搵股神巴菲特入股,股神肯用筍價投資,好多CEO已經感恩戴德。如果咁樣去睇小米定價同讓利,相信對股價前景會有唔同角度。當然,喺貿易戰這樣風高浪急的股市,即使新股有一定質素,仍然面對市場風險。小米股價也未必會一帆風順。

陸羽仁

hd