金融High Tea——跌市最宜做功課

        港股昨日遭遇兩個炸彈轟炸,一個係美國再出招向2000億美元中國貨徵稅;同時內地樓市又傳收緊樓市措施,13日內已有22個省市,包括廣東、上海等收緊樓市調控。分析估計,下半年樓市調控力度會超越上半年,調控措施升級會不斷出現,呢個都係股市壓力來源。中國嚴控樓市,似乎係怕人民幣不斷貶值後,內地樓市炒風再現,喺雙重打擊下港股再插。股市短期難測,投資者唔預咗長期抗戰,就不如食少多覺瞓。

港股中兩個炸彈

  上個星期五美國落實首輪第一部份340億美元貨品加徵關稅措施,還有向160億美元貨品加稅跟尾;點知160億加稅措施都未生效,美國又列出向2000億美元中國貨加徵關稅清單,進一步針對「中國製造2025」計劃涉及的高新製造業產品。當局預計8月20日至23日會就清單舉行公眾諮詢,相信8月30日前都不會實施。對於美國行動,中國未有即時作出回應,隔咗幾個鐘頭後發表聲明強調不滿外,未有提及具體反制措施。

  特朗普對付中國絕不手軟,就算對付自己盟友都一樣,佢差唔多同一時間又再向油組施壓,質疑佢哋推高油價。佢之前已經話油價太高,今次似乎係再度加壓。油組方面唔敢硬頂,只係話佢哋控制唔到頁岩油等生產,根本唔存在操控。由於美國因素,加上擔心喺美國上市會面對集體訴訟,沙特想將國營石油公司沙特阿美上市計劃似乎愈來愈渺茫,睇特朗普呢啲動作,形容佢係股市亂象之源,一啲都無錯。

  除咗貿戰因素,內地七個部委在30個城市,開始治理樓市亂象專項行動後,多個城市密集加強樓市調控,成為股市兩個炸彈,A股一度大插超過2%。上證指數收報2777點,跌1.8%;深證成指收報9023點,下挫1.97%。恒指開市急跌後回穩,收報28311點,跌370點;國企指數收報10658點,下滑166點,成交959億元。

衛星股殘上加殘

  藍籌股幾乎全線向下,僅得石藥集團(1093)和銀娛(027)錄得升幅,石藥收升0.5%,報22.3元;銀娛漲0.3%,收報61.55元。騰訊(700)再傳遭大行調低評級,成為拖累恒指最多的藍籌股,收跌1.9%,報379.4元,單隻股份拖低恒指56點。另一隻科技大股小米集團(1810)早市曾創上市新高,收市無升跌,收報19元。美國再向中國2000億美元產品加徵關稅,拖累出口相關股份下跌,敏華(1999)收跌3.8%,報5.88元;創科(669)跌0.5%,收報43.6元;敏實(425)跌2.9%,收報31.35元;耐世特(1316)跌3.6%,收報10.66元。中資金融股受A股跌幅拖累,建行(939)跌2%,收報6.85元;工行(1398)收跌1.6%,報5.56元;中行(3988)跌1.9%,收報3.64元,三隻股份合共拖低恒指81點。

  中美貿易戰朝向惡化同長期化發展,有中環茶友問作為投資者點樣自處?無錯,O依家兩國經貿關係陷入低潮,但無人知明日會點,尤其是美國總統個權咁大,特朗普又咁善變,所以買股要預咗長坐,入市買貨若然有機會賺到短線利潤就係意外,有胡可以先食。如果唔係咁諗,咁就一動不如一靜。O依家好多股份都創咗一年新低,而且生意未必同中美貿易有關,但一樣大跌,好似兩隻衛星股亞洲衛星(1135)同亞太衛星(1045)。

  衛星股其實同收租股有啲似,主要業務之一係出租轉發器。近年由於轉發器增加,形成搶客戰,租金產生壓力,所以衛星股股價下調,亞洲衛星由高位超過20元,昨日跌至5.48元,市盈率唔夠六倍,息率有七厘;亞太衛星前景好啲,市盈率相近,但派息率就大約4.5厘。亞太衛星過去五年盈利無乜變動,但股價由高位插咗一半。本來佢業績有壓力,股價下跌,加埋大市唔好再打多兩槌,如果再跌吓就變成茶渣價。類似股份慢慢會增多,喺茶渣中慢慢揀吓有息派嘅好嘢長揸,喺呢啲市況下值得做啲功課。

陸羽仁

hd