金融High Tea——沽恒生買中銀有得諗

        港股連升四日後回軟,昨日跌番139點,大市上升尾段交投已經跟唔上,動力有啲唔夠,昨日成交只有813億,加上人民幣匯價波動,都形成不穩定因素,升勢無以為繼。

  七月份就快過,呢個月市況動盪,唔見傳統的七月大翻身。喺波動市中,最威藍籌唔係新經濟股或地產股,而係好平實的恒生(011),昨日佢收報207.6元,逆市升0.7%。恒生股價攀升,最大誘因都係同美股有關,呢個月美股炒傳統股,市場憧憬銀行業績好,股價追落後,與科網股爭一日長短。香港銀行股之中,恒生被視為最穩陣之選,加上派息高,喺經濟擴張期受惠下,吸引避險資金流入。

投資東南亞形成估值窪地

  銀行息口唔差,主要係盈利派息比率高,若然睇恒生市盈率同市帳率,佢都係銀行股之冠,分別達市盈率20.2倍同2.6倍。陸羽仁同銀行界猛人傾起本地銀行股,佢話本地銀行股滙控(005)同渣打(2888)都比較國際化,盈利來源好唔同,業務同恒生最接近應該係中銀香港(2388)同大新銀行(2356),後者規模相差好遠,不可比較。能夠直接比較應該係中銀香港,O依家中銀香港股價由高位42.15元,跌番落去昨日收市價37.8元,回調幅度有一成,佢市盈率唔夠13倍,息率有3.7厘,高過恒生的3.3厘,數字上中銀香港可以話係贏晒,咁究竟點解佢會跑得慢過恒生咁多呢?

  銀行界猛人提供咗幾個理由,首先係恒生營運效率高,業績穩定,好多投資者只買不賣,當作收息,形成供求緊張;其次就同中銀香港近呢一年發展策略有關。由於中銀香港先後出售南商同集友兩間銀行,籌資用來發展東南亞業務。部份投資者擔心東南亞政經局勢不穩定,所以中銀估值雖然已經高過滙控等國際銀行(中銀香港市帳率1.65倍,滙控1.1倍),但始終追唔到純係做香港業務的恒生(恒生市帳率2.6倍)。

  對於中銀香港相比恒生估值折讓,猛人又點睇呢?佢話香港真係做銀行的寶地,環境之好舉世難尋,在此地做銀行好易賺錢,搞到台灣賺錢的銀行,其實只有香港業務有錢賺,而恒生業務穩定無可置疑,不足之處係集中香港,發展空間較細。外界對中銀香港發展東南亞生意有戒心,形成股價低水,用內地用語講叫做「估值窪地」,好大程度係源自不了解。雖然東南亞環境無香港咁平靜,但中銀香港在外地做生意的對象,主要係服務番中國人,譬如係內地國企或國企員工,所以對佢哋背景掌握好清楚,放貸風險唔係好似想像咁高,而且從估值睇,中銀香港估值低過恒生近半,等同東南亞業務係免費奉送。

  聽完分析,咁O依家恒生升得多,中銀香港係咪有機會追落後,又或者係咪可以考慮沽恒生,買中銀換馬呢?猛人就話,買股呢啲嘢無絕對,有時都要講緣份,情人眼裏出西施,恒生估值貴,但有啲投資者貪佢穩定,唔會變心,亦唔排除短期內佢會強者愈強,繼續跑贏。如果從進取角度,恒生創咗新高,升極有限,中銀香港從估值同歷史股價睇,水位應該多啲,進取者就自己諗啦。

騰訊擺脫唔到弱勢

  呢排人民幣匯價波動,對市況不無影響。人仔早上曾經反彈,但之後乏力回落,離岸人民幣下午跌幅擴大,一度急插超過400點子,低見6.795兌1美元,其後跌幅略為收窄。

陸羽仁

hd