金融High Tea—— 科企震央擴大

        美國科技股跌開有條路,本地科網股一如預期,「騰騰震」騰訊(700)成為大市跌源,雖然指數只係跌百零點,但騰訊大插3.3%就相當驚嚇。

  呢輪美國科技股下插,範圍相當全面,焦點係社媒facebook,拉闊一啲睇,電能車企Tesla同收費網視Netflix都有壓力,震央有啲逐步擴大的味道。佢哋回落表面理由係市場解讀佢哋業績有不同問題,好似Tesla一向賺唔到乜錢,基金不滿沽貨,大家無乜感覺,去到Netflix腳軟,市場關注多咗,到facebook單日大插近兩成,市場就有震撼感覺。

主要股東先後沽貨

  美國科技股呢輪調整,雖然話係增長放緩觸動咗市場神經,但美國科技業壟斷性好強,核心業務外連未來有發展潛力的領域,佢哋透過收購或研發已經掌握優勢,市場忽然擔心佢哋增長無以為繼,與其話係有根有據,不如話借意沽貨。從近日市場表現,資金由增長股轉向傳統股,反映咗市場換馬,避險意識增強咗,源頭相信係來自美息向上的趨勢,再加埋貿易戰威脅,搞到資金向收入比較扎實的傳統股轉移。

  本地股王騰訊係呢一浪科技股跌浪,可以話「先拔頭籌」,跑贏美股同行,第一個警號係佢南非大股東係年初大批股套現千億元。南非大股東基本上喺佢上市以來未賣過股。佢要大力沽貨必須係個市好壯旺之時先做得到,結果佢就成功把握到年初的良機,當時中環茶友已提醒市場多咗咁多股票供應,必然令騰訊股價受壓,其後佢股價一直有波幅、無升幅,反覆尋底。雖然有好多人話買騰訊就算買貴都唔會買錯,但O依家睇番買貴代價都可以幾大,如果炒衍生工具就更加傷。

  睇來騰訊大股東減磅,唔係孤立行為,無論facebook抑或阿里巴巴大股東馬雲同蔡崇信,都有減持行為,佢哋減持理由多數係為咗做慈事同個人財務規劃。雖然呢啲解釋會令市場疑慮減少,但接二連三有類似行動出現,就唔係偶然。呢啲大股東手頭有大把股份,如果唔趁市旺有價,基本上唔容易大手甩貨,甩完貨就算股價再升,佢哋都仲有大把股在手,佢哋咁做唔可以話係完全睇淡,但至少反映去到呢個水平,都差唔多係短期到價。

  美國科技股跌潮,推低晒本地同一板塊,港股下跌,恒指收報28583,跌150點;國企指數收報11024,下滑21點,成交875億元,如果唔係傳統股好似恒生(011)繼續造好,跌幅絕對唔止咁。以整個7月份計,恒指累積下跌372點或1.29%;國指累積跌48點或0.44%,大市已經連跌3個月,累跌2225點,為2016年12月以來最長跌市。

小米有向下尋底之勢

  昨日十大成交不乏科企,騰訊再急挫3.3%,收報355.2元,成交達132億元。騰訊股價由今年初高位475.72元(以除淨調整後計算)與周二收市價相比,市值蒸發1.14萬億元。小米(1810)單日跌幅仲傷,大挫5.8%,收報17.6元,有向下尋底之勢;金蝶國際(268)下瀉8%,收報8.69;手機股舜宇光學(2382) 跌5%,收報129.5元;瑞聲科技(2018)跌0.4%,收報100元。

  雖然科技股有壓力,作為本港首隻無收入生物科技新股歌禮製藥(1672)今日掛牌,上市前夕在暗盤市場向上,約報14.8元,較上市價14元,升約6%。教育股呢排當炒,新股博駿教育(1758)首掛收報2.87元,較上市價2.36元,上升22%,不計手續費及佣金,一手2000股帳面賺1020元。

  另外,傳統銀行股業績發威,渣打集團(2888)公佈上半年業績,除稅前基本溢利23.56億美元,按年增23%,同時恢復派發中期息6美仙,公佈初段股價上升,但尾市倒跌3.8%,報69.35元。恒生再創上市新高,高見215.6元,收升0.47%造213.6元,暫錄八連升,中銀香港(2388)收漲0.5%報38元。

陸羽仁

hd