金融High Tea——中國捱打 港股內傷

        中美兩國喺貿戰談判埋牙前鬥大,加埋聯儲局暗示下個月加息,港股受到兩邊夾擊,陣痛痛到抽筋,再創今年低位。

人仔離岸價又插過

  美國總統特朗普再向中國叫陣,提出大加中國貨關稅,以抵銷人民幣貶值影響。美國媒體解讀係中國唔肯就範,所以特朗普要再加碼,稅率由10%提高至25%。特朗普曾經講過,國家主席習近平係橋牌高手,看來佢同樣精通此道,佢出牌不按牌理,經常令人估佢唔到。美媒話佢咁樣係迫中國談判,接受佢辛辣嘅條件,中方對於特朗普叫牌價態度依然未軟化。對於美國官員證實特朗普提議對2000億美元中國貨品加徵關稅,諮詢期延長至下月5日。外交部發言人耿爽奉勸美方不要試圖搞訛詐,認為對中國不起作用,又奉勸美方回歸理性,不要意氣用事云云。

  美國話加關稅對付人仔下跌,但人仔有理無理繼續下調,昨日跌幅持續擴大,人民幣即期收市跌352點子,報6.83兌1美元,離岸人民幣兌美元創13個月新低至6.855,日內跌近300點,甚有各自出牌味道。

  中環茶友熱議特朗普牌藝,有茶友認為談判通常表裏不一,外表兇狠,可能裏面就講緊數。牌面睇,美國王牌大過又多過中國,中國明顯處於下風,只能輸少當贏,呢個亦係普遍分析。茶友仲留意到,有美國國會議員質疑,內地係咪影響緊美元匯價同金價,呢單新聞未必好多人留意,但就要小心美國將火頭燒開去,將貨幣戰當作另一張牌。從呢個角度睇,今次就算關稅談判即使有得傾或者傾得成,都唔係中美角力終局。

  中美牌局鬥扭六壬,美國揸晒大牌,中國暫時只能捱打,所以雙方一有接觸,就出現美股強、中港股弱狀況,而且談判過程有枱底、有枱面,令市況難測,所以呢啲時候入市,就算諗住短炒,都要做定隨時後手準備,若然無足夠資金,就不宜輕率出擊。

  近日例跌的騰訊(700)一度急插3%,收市跌左2.8%,收報345元。騰訊連插多日,股價僅在本周就下跌8%,連一向追捧佢的大媽都開始腳軟,分析師更加唱得悲觀。

  摩根大通本周將該股目標價下調4%至480元,稱短期內騰訊遊戲收入可能疲軟,但預期在第二季度業績公佈後,明年業績前景可能會改善。至今至少有11間大行或機構下調騰訊目標價,其中包括瑞信和摩根士丹利。呢啲股價目標有少少隨大市任噏的味道。

強勢板塊濠賭股都被拋

  喺指數再創今年低位下,強勢板塊都開始腳軟,濠賭股成日沽貨目標,銀娛(027)急挫5.3%,收報58.85元。同一板塊的永利(1128)更大插近10%,報收20.75元,淡友質佢理由係業績差於預期,最令人失望是澳門半島項目,貴賓廳業務明顯轉差。

  瑞信推算永利在貴賓廳和中場市佔率都有流失,將今明兩年經營現金溢利預測調低8%和9%,目標價相應降至36元。

  但認為永利過去兩個月股價已跌約兩成,相信負面因素已反映,維持跑贏大市評級。高盛、德銀和花旗都擔心貴賓廳市場增長放緩,但競爭加劇,例如美高梅和新濠天地,今年底至明年初分別有新貴賓廳開幕,會限制永利業績改善空間。板塊捱沽下,澳博(880)跌左4%,差唔多跌番晒日前急升的進帳。

陸羽仁

hd