金融High Tea——車股等炒政策

        港股假前急插454點,假後出現反彈,恒指一度升過500點,但市場觀望美國議息後聲明點講,下午有投資者計數,收市升317點。利率上調利好銀行業,幾隻大銀行股都跑贏大市,油股亦繼續受惠油價上升,向高位進發。

銀行石油股成雙引擎

  美國呢兩日議息,預計將會調高息口0.25厘,香港呢次有機會跟加,成為本地利率喺金融海嘯後首度向上調升。銀行股繼續炒利口上調拉闊息差,幾隻大銀行都造好,滙控(005)一度重上70元水平,收報69.65元,升0.7元。中銀香港(2388)股價相對落後,收報37.3元,升咗2.5%,幅度大過恒生(011)的1.2%。恒生股價係呢季表現神勇,但係創咗歷史新高開始慢咗落嚟。

  另外,英國布蘭特期油繼續喺80美元以上挺進,三桶油表現向好,布蘭特期油噚日升上81.5美元水平,創四年新高。中石油(857)受帶動急升4.9%,收報6.27元;中海油(883)升4.4%,收報14.84元;中石化(386)升2.4%,收報7.74元。大摩發表報告,指布油升至80美元以上水平,為2014年11月以來首次,預料市場將重估中海油估值。中海油股價曾升4至5%,基於中海油作為主打採油的上游企業,兼且控制成本能力強,相信隨著油價趨升,料市場會對中海油作出重估。大摩對中資石油股喜愛次序首先是中石油,第二是中海油,最三才是中石化,但中海油有重估優勢。石油設備及服務股同樣受惠於高油價,百勤油服(2178)升一成五,收報0.39元;巨濤海洋石油(3303)升超過一成,收報1.16元;MI能源(1555)宣佈,出售油氣勘探及開發業務給公司主席,涉及金額約2.5億美元(約19.6億港元),股價暴升逾五成四,收報0.275元。

傳A股納富時指數

  喺銀行同油股兩個引擎推動,加上傳聞富時羅素將在今日(27日)宣佈,將A股納入旗下指數,MSCI明晟亦考慮向市場諮詢,將A股指數比重由5%調高至20%,帶動A股向好。恒指一度重上28000關,飆升532點,高見28031點,收報27816點,急升317點;國企指數收報10985點,漲158點,成交1080億元。

  喺加息同中美貿易戰下,除咗跟住大環境炒,另一個策略就係跟住中央招數去投資。中美角力無咁快搞掂,阿爺首要係穩定本身經濟,喺咁嘅環境下就會不斷出招,好似催谷基建,加大內需。O依家有可能成為中央力挺經濟招數之一,就係提振車市,呢排就有啲外資行開始研究阿爺喺呢方面點出招。

  中央要增加同美國講數的籌碼,經濟上不能示人以弱,所以有可能利用減稅等措施去推動消費。樓市係中國第一大內需,但樓價上升會引起社會反應,無得谷,仲要壓;汽車消費係第二大內需市場,所以阿爺好大機會幫下車市。

  今年汽車股表現麻麻,主要係經歷近兩年的大旺市,今年賣車數字在五、六月轉弱,汽車股順勢大力回吐。市場開始憧憬車股有可能成為政策受惠者,加上佢哋股價調整咁多,有機會借政策炒作,好以上半年比較弱的比亞迪(1211),過去兩日累升近3%,昨日升咗0.7元,收報55.4元。

  昨日車股喺升市中表現唔係太突出,陸羽仁估計,一來係美國車股受美國同加拿大仲未能達成貿易協議大跌影響;二來係之前佢哋個別都炒咗一輪。個股方面,除咗比亞迪,好似吉利(173)同廣汽(2238)呢類有自主品牌的股份會較為有利。廣汽過去一年高位為15.75元,早排插到去6.75元後反彈,昨日收報8.35元,跌咗0.04元,市盈率5.8倍,息率有5.5厘,股價看來已預計今年盈利同派息可能下調。如果想搵啲有政策炒的股份,可以吼位留意一下車股。

陸羽仁

hd