金融High Tea——杜指隨時追過恒指

        美股杜指前晚再創新高,收報26774點。港股並無受外圍帶動,雖然前日大跌超過600點,但昨日未見反彈,指數一度跌穿27000點,收報27091點,下挫35點。有中環茶友話,若然港美股市繼續背馳,好快杜指就會超越恒指。

美國優勢推動股市猛漲

  呢個世紀以來,恒指長時間高過杜指好多。香港過去增長比美國為佳,帶動股市向好,其後中國開放改革,內資股來港上市成為新動力。喺2000年,杜指大約係11000點,港股則在15000點以上,高大約35%。到2008年金融海嘯低點,杜指差唔多跌到去7300點左右,港股則在12000點,差距擴大到接近65%。由當時低位計,杜指升幅係2.6倍,港股係1.2倍,所以如果喺金融海嘯後,喺低位用同一筆資金買入指數基金,買美股唔止跑贏一倍。

  美股有出色表現,當然同美國支配全球利率同貨幣政策有關。同時,美國喺新經濟上領導群倫,帶動全球經濟轉型影響可能更大。美國總統特朗普話,其他國家喺貿易問題上佔美國人便宜,實際上美國企業透過本身的軟實力,佔領全球市場,成為帶動美國強勁復甦的主因,解釋咗為何資金源源不斷流入美元資產。

  美股表現凸顯美國商業力量強橫,華盛頓期望透過貿易戰強化本身領導地位,所以貿易戰開打以來,美股不跌反升;相反,中國同香港股市就持續受壓,究竟呢個情況幾時扭轉,成為華爾街尋求答案的一百萬美元問題。

  美股強,港股弱,加上無北水買貨,港股陰乾。由於新興市場再起波瀾,印尼盾及印度盧比匯價創歷史新低,恒指裂口低開286點報26840點,景況都有啲嚇人,同時亦係兩周低位,之後大市就開始反彈,曾倒升143點。最後,恒指微跌,國企指數好少少,收報10786點,升31點,但大市成交只有675億元。

  騰訊(700)分拆旗下騰訊音樂到美國上市,公司向美國監管部門提交初步上市文件顯示,初步發行股份規模列為10億美元(約78.3億港元),遠較早前傳聞少。早前有指,騰訊音樂原本預期集資40億美元(約313.2億港元),惟當時騰訊回應指相關報道內容失實。騰訊喺公司繼續回購下,收跌0.32%,收報316元。另外友邦保險(1299)急跌2.6%,收報65.8元;美團點評(3690)跌2.5%,收報65.05元。

  澳門旅遊局引述澳門治安警察局就今年十一黃金周統計數據顯示,10月2日(黃金周第二日)總訪澳旅客14.42萬人,按年增長10.8%。黃金周首兩日總訪澳旅客27.6萬人,按年上升14.3%,其中內地旅客按年上升27.2%,刺激濠賭股造好。金沙(1928)升2.6%,收報34.95元;新濠(200)漲2%,收報15.68元;銀娛(027)收升1.5%,報48元。

  零售股亦逆市上揚,莎莎國際(178)升1.5%,收報4.12元;歐舒丹(973)升1%,收報13.7元。

燃氣股真正死因係敏感

  10月第一個交易日,燃氣股成為跌市重災區。大行瑞信事後分析死因,並非同市場擔心的政策調整有關,而係對消息過份敏感,一有風吹草動就沽低股價。據該行說法,大跌成因係重慶取消安裝費,惹起市場憂慮其他城市照跟,同時擔心會對燃氣連接費進行監管。實際上,取消安裝費同連接費應該無關,只係市場將兩個收費混淆。早喺去年內地已對連接費進行咗監管,納入將燃氣銷售限於資產回報率7%的範圍。瑞信估計,喺當局作出澄清前,燃氣股會維持弱勢,但到低位投資者適時可買入燃氣股,行業首選華潤燃氣(1193)。

  按照瑞信解讀,燃氣股急跌有點係風聲鶴唳,誇大咗個別政策的影響。睇番國際天然氣價格,因為內地需求強勁,今年表現堅挺,所以做上游的燃氣生產商,經營環境唔係咁差。拉大啲去睇,燃氣股突跌,其實反映市場資金少,承接力唔夠,造成市場信心脆弱,令早前累積升幅大同估值高的板塊,一有異動就拋風四起的境況出現。

陸羽仁

hd