金融High Tea——中國休市 大行抽水

        內地休市,外圍因素影響加重,但美股升,港股卻反成抽水對象,恒指10月復市連跌兩日,昨日再插467點。

  美股繼續創新高,理論上港股應該有條件反彈,但大戶掉轉玩抽水,大行藉住出報告唱淡中美貿易前景,加埋美國債息湧高,令港股連續兩日下跌。恒指跌穿27000關,收報26623點,挫467點;國企指數收報10547點,跌238點,成交金額802億元。恒指自2003年即超過15年以來,首次低過美國杜瓊斯工業平均指數,比杜指周三收報26828點低咗205點。

舊瓶新酒搵位插

  跌市搵理由,從市場因素講,美國聯儲局主席鮑威爾表明,可能加息至高於「中性」利率水平,推動美匯指數一度升至逾一個月高位,美匯指數高見96.121點,為8月20日以來高位,印度盧比受壓繼續尋底,兌美元曾跌0.6%,觸及73.813的紀錄新低。韓元、印尼盾就持續疲弱。

  喺美元強勢下,人民幣自然唔會獨挺,離岸人民幣(CNH)午後跌勢擴大,跌穿6.91,但走勢已經比其他新興貨幣強少少。

  市場有風吹草動,外資就小事化大。摩根大通發表報告,預測喺中美貿易爭端升級情況下,美元明年或持續上升,預計人民幣進一步貶值。更加辣的是,該行認為無明顯跡象顯示中美貿易糾紛,會在短期內得以緩和,預期中美兩大經濟體衝突會升級,明年將爆發全面貿易戰,如果不計中央支持經濟措施,對中國經濟影響達1個百分點,所以將中國股票評級由「增持」調低至「中性」,原因是預期明年會爆發全面貿易戰。

  大行突然對中美貿易戰唱到咁淡,細睇論據都係新瓶舊酒,其實搵唔到乜嘢新意,同一樣的風景,大行可以話金風送爽、又可以話秋風肅殺,大有任佢講的味道。陸羽仁覺得,大行呢次係設局抽水。

  美股趁好消息炒上,港股本來可以照跟就會炒一輪反彈,大行就趁內地無市,阿爺仲放緊假出嚟掉轉玩。睇番大市連續兩日急跌下成交都咁少,大行趁北水停流偷襲,唱淡報告出街前,可能佢哋已經沽咗貨,兵荒馬亂中佢哋好有機會成功食胡。

  細睇吓個股,騰訊(700)喺呢期繼續弱勢,雖然公司不斷回購,但股價一直被人壓住,大市下插,佢又跌2.4%,收報308.4元。騰訊喺過去一年係散戶至愛熱門股,佢股價翻唔到身,對散戶信心造成好大打擊,可見大戶唔係省油的燈。另一樣係港股全日成交802億元,但沽空金額有144億元,沽空比率達18%。沽空股份中,盈富基金(2800)佔10億元,佔沽空總額7%;騰訊6億元,佔6%;建行(939)7.9億元,佔5.5%;連中移動(941)都有7.1億元,佔近5%。

李超人投自己公司一票

  喺跌市中,長和系大股東接連出來增持,計一計數,踏入九月,李嘉誠及李澤鉅父子先後多次增持長實股份,包括兩人各自擁有50%權益之公司,合共購入長實共2455萬股,涉資14.1億元;李嘉誠基金會購入長實共201.4萬股,涉資1.16億元,總計增持股份動用超過15億元。

  李嘉誠今年三月出席業績公佈記者招待會時曾經講過:「除非我出售公司股票,把賣股票、賣公司後的真金白銀帶走才是撤資。但過去20年來,我從來沒有減持公司股票,有買無賣,所謂『撤資』完全不成立。」長和收報85.55元,跌1%,調整幅度細過大市。

  有中環茶友問,李超人係咁增持長和,係咪代表佢睇好呢?李超人係咪睇好大圍港股,唔可以從佢增持長和股票睇到,真正能夠講的,係佢用銀紙投下對自己公司信心一票啫。

陸羽仁

hd