金融High Tea——強者受壓 銀行股插

        美國股市續跌,加上人仔下挫見10年低位,港股開市下挫,雖然中午一度倒升,但下午再度乏力。最近兩大銀行公佈業績,當中中銀(2388)被指業績遜預期,股價下插。本地銀行股本來今年表現係強者,O依家終於出現強者都頂唔順的現象。

  兩大銀行宣佈業績,大笨象滙控(005)成績比預期為佳,股價一度受惠造好,但先升後回,收市跌0.6%。相比之下,中銀香港第三季業績受投資氣氛轉差、股市表現及成交持續萎縮影響,拖累中銀香港收入倒退。截至今年9月底第三季,中銀香港提取減值準備前淨經營收入為135.7億元,按季減少1.3%;經營支出按季增長6%,達38.12億元;提取減值準備到前經營溢利為97.58億元,按季跌4%。

美林維持中銀買入評級

  其實,中銀香港份成績表勉強都算持平,無奈市場話覺得失望,股價即時有反應,開市一度下插到29.2元,收報29.45元,跌7%。投資者睇到咁嘅狀況,都走夾唔唞,連恒生(011)都沽埋一份,推低咗佢股價4.1%,收報182.1元。

  認真啲講,本地銀行股業績唔算太差。好似美林喺中銀績後發表報告,認為佢估值吸引,增長穩健,維持「買入」評級。報告主要正面觀點包括集團經調整淨息差持續上升,按季升8基點至1.69,首9個月貸款增長8.2%,按季增長0.8%,優於市場表現,而且不良貸款較中期下降3個基點,不良貸款率僅為0.19%。該行認為,雖然宏觀環境變化令市場憂慮,但相對恒生2.1倍的市淨率,中銀香港1.2倍的市淨率非常具吸引力,而且中銀香港增長穩健,股息率有5%亦非常可觀,維持買入評級。

  大行唱好,市場卻借業績沽低佢哋,主要係大市連番下插,成個市估值都要向下,好股雖然無大問題,但基金都開始想沽貨套利,呢個係跌市去到比較後期的現象。通常大戶先沽劣股同高估值股份,跟住最後才沽強勢股。

  中環茶友最近與商界頭面人士摸酒杯底,就感覺到銀行態度似乎有點改變,佢哋對客仔信貸明顯審慎咗。呢位頭面人士話,最近銀行家態度,令佢想起10年前美國爆發金融海嘯時的做法。當時銀行會同客仔講,叫佢有錢就還住先,還完之後可以借過。不過如果個客仔好老實咁還錢,就會發現唔係咁易借番,皆因風頭火勢,銀行都會自保,有錢唔會隨便借。頭面人士所講的情況,暫時仲未出現,不過佢就覺得,銀行O依家借錢無之前咁鬆手。

  茶友話,呢位頭面人士做咗幾十年生意,見過唔少兵荒馬亂場面,所以作風特別穩陣,唔排除佢嘅說法有過敏成份。不過,股市自年中下挫,一個直接原因係水頭有點不足,股票係最流通資產,有閒錢好多人會買吓股博增值,手緊時就會沽貨套現。生意人如果對前景審慎,即時反應係對投資小心咗,呢個部份解釋咗股票跌咗咁多,但購買力仍然唔係特別強。

  除咗強股變弱勢,人民幣亦都持續貶值,中間價和在岸匯價創逾10年新低,港股難逃向下壓力。恒指收報24585點,下跌226點;國指收市失守一萬關,收報9998點,跌13點,成交金額996億元。本地銀行股大跌外,騰訊(700)曾插3.3%至251.4元,見近一年半新低,收市仍跌3%,報252.2元;平保(2318)放榜後野村續叫買,加上將啟動過千億回購方案,股價跌0.3%,收報72.55元。

  離岸人民幣跌穿6.97兌一美元,中資航空股回軟。國航(753)挫3.9%,收報5.9元,創52周新低;南方航空(1055)下滑1.7%,收報4.02元;東方航空(670)收跌1.4%,報4.1元。另外,國泰(293)股價連跌五日後反彈,收升1.2%,報10.04元。

  表現較好板塊就有汽車股。國家發改委提出建議,將1.6升及以下的乘用車車輛購置稅,由現時10%減至5%。長汽(2333)揚7.3%,收報4.39元;廣汽(2238)首9月多賺一成,股價曾飆近9%,收升4.3%,報7.57元。

  喺跌市中普通投資者唔敢買,但有啲長線基金就會慢慢入貨。全球最大主權基金挪威主權基金投資主管透露,未來會加大對A股投資。

  呢個國家主權基金O依家管理超過9700億美元,但喺內地股市投資只有250億美元,按基金主管形容係微不足道,所以未來無可避免會加大投資。對挪威主權基金呢啲長線投資者而言,O依家A股大跌市,正係難得投資機會。

  聽到主權基金話有興趣入市執平貨,但股民反應不宜太快,因為學基金主管講,佢哋入市過程好慢,經常以年做單位,好似老饕開餐一點都不心急,所以他們有興趣入市,代表基本質素同估值開始吸引,但唔代表個市好快會火箭式上升。

陸羽仁

hd