金融High Tea——特朗普財演效應

        多災多難嘅10月終於過去,恒指喺最後一個交易日勁彈394點,令上月港股跌幅減至3000點以內。睇番成個10月,恒指累挫2808點或略逾10%;國指累積跌879點或8%。

  港股昨日反彈,除咗因為累積跌幅深之外,仲多得美國總統特朗普喺中期選舉前充當臨時財經演員,大力唱好共和黨同股市前景。佢接受霍士新聞訪問時稱,期望在11月底與中國國家主席習近平會面時能達成理想協議,但不認為中方已做好準備。同時佢又對聯儲局接連加息表示不滿,認為聯儲局做法保守,而佢一向唔喜歡保守。

畀埋標指目標價

  特朗普仲客串做財演,推文話美國股市呢排下跌,係受中期選舉因素影響,但不要忘記由佢上任以來,美股已經上升咗五成,仲話如果投資者想見到股市繼續跌,強烈建議投給民主黨人,因為他們喜歡委內瑞拉的金融模式,即高稅收和開放邊境。佢不忘引述富國銀行高級策略師Scott Wren稱,如果美國聯儲局開始放慢加息節奏,採取更「鴿派」立場,相信標普500指數可以重返2800至2900點的目標區間。

  特朗普喺呢個時候做財演,雖然睇落有啲滑稽,同傳統總統泱泱大度唔講股市之風有別,但亦唔好睇小佢呢招威力,因為10月美國股市咁波動,唔多唔少真係同中選唔明朗有關,而且唔排除同反對者喺呢個時候推低個市,製造不利共和黨氣氛。特朗普說法有點踢爆味道,減低股市調整對選民情緒衝擊。

  另一方面,O依家美國中期選舉,外界似乎唔敢太睇淡共和黨行情,若然共和黨繼續主導美國政情,特朗普維持相當影響力,以其股市好友姿態,必然想辦法催谷,佢咁樣出口術,長遠影響唔知,但對美股就有提神作用。

  隔晚美股急升,帶動恒指高開167點,之後升幅一度收窄,但由於A股走勢回勇,港股重拾動力,恒指午後再上,收升394點,報24979點,國指收復一萬點關口,收升139點,報10138點,成交金額增至1064億元。

  大市反彈跡象明顯,其中一個現象係累跌得多的股份彈力特別勁。騰訊周二創年半新低後反彈,急漲5.9%,收報267元;加上滙控(005)亦成為升市功臣,股價升2%,收報64.4元;友邦(1299)升1.89%,收報59.35元,三股合力撐起恒指213點。近日插得多的手機相關股都急升,比亞迪電子(285)飆7.5%,收報9.19元;高偉電子(1415)乾升6%,收報0.9元;舜宇光學(2382)彈5.8%,收報68元;瑞聲(2018)炒高4.7%,收報59.65元。手機設備股市盈率仍然唔平,加上佢對中美貿易戰始終比較敏感,炒呢個板塊股價雖然刺激,但真係走慢啲都可能中招,必須要小心。

  美股喺特朗普財演效應下造好,A股同港股齊齊反彈,但中港經濟同美國並唔同步。O依家港股仲要留意內地經濟受貿易環境不利影響有幾大,加上人民幣匯價近日走勢反覆。中國外匯交易中心公佈,人民幣即期收跌121點子,報6.9734兌1美元,續創逾10年低位。

阿爺關注放緩跡象浮現

  另外,國家統計局公佈,10月中國製造業採購經理指數(PMI)為50.2,按月回落0.6個百分點,低於市場原預期50.6,製造業總體繼續運行在擴張區間,但擴張速度放緩。從分類指數看,在構成製造業PMI的五個分類指數中,生產指數和新定單指數高於臨界點,原材料庫存指數、從業人員指數和供應商配送時間指數低於臨界點。生產方面,指數為52%,按月回落1個百分點,繼續位於擴張區間,表明製造業生產擴張步伐放緩。新定單指數為50.8%,按月回落1.2個百分點,但仍位於臨界點之上,表明製造業市場需求增速回落。

  昨晚官媒報道,中央政治局會議指當前經濟運行穩中有變,經濟下行壓力加大。通常阿爺察覺有異象都會做嘢,今次應該都有呢個機會,政治局開會講經濟係利好消息。

  美國中選前有總統特朗普維穩,唔排除港股喺累跌咁多下會有一輪回升,但喺經濟放緩跡象浮面下,暫時都只能當反彈去睇。

陸羽仁

hd