金融High Tea——騰訊的罩門

        美股連續兩日大彈,帶動港股重上25000點。同美股相比,內地股市下午升幅收窄,反映A股回升後投資者又開始觀望。畢竟股市喺10月受重創,短期信心唔易恢復。同樣,美股喺中期選舉前雖然急速回升,但選舉過後政經局勢開大開細都唔易估,喺咁嘅環境下,低位撈咗貨的投資者高位可能會先食胡計數。

  指數反彈,權重股騰訊(700)亦喺見一年低位251元後持反彈,幅度有近9%,但相信低位入貨者唔係咁多,就算有都可能係溝淡,食到胡者有限。騰訊今年大插,係推低恒指一個重要因素,早前與內地一位互聯網權威傾起點睇騰訊,呢位權威人士不但對內地互聯網生態有深刻研究,而且對內地政府運作同法規都好有認識,又有同內地互聯網大佬直接對話。

  權威人士話,騰訊現時有兩大困擾,一是來自監管收緊;二是本身創新局限。佢話,內地對網絡遊戲監管,係從社會影響考慮,並唔係針對個別公司。騰訊雖然係市值萬億的巨企,但差唔多有一半收益都是來自遊戲,咁就出現很大問題。言下之意,是內地對於手遊監管陸續有來,未來一段時間騰訊這項主要業務,都要面對一個較為嚴苛的經營環境,唔易好似過往咁樣高速增長。

產品創新出現倦怠

  另一方面,權威人士又用略帶批判性的觀點睇,認為騰訊自從推出微信後,有點恃住使用者眾多優勢,在產品創新方面似乎慢了下來,有點倦怠,所以在過去兩年,再見不到有很亮眼的新服務推出,這就令人感覺到有點停滯。相反,阿里巴巴的創新比騰訊多。權威人士呢種內幕分析,點出騰訊金剛不壞身上的罩門弱點,睇到外界睇唔到嘅問題。

  權威人士的睇法,是從長遠企業發展角度出發。資本市場的操作,有時還受到不同因素影響,譬如大股東減持影響市場供應,港交所放寬同股不同權公司上市增加競爭等都有影響。不過,長遠而言,股價表現仍然要跟公司經營走,所以這些觀點未必即時緊貼股價走勢,但就對分析公司長遠投資價值好有參考作用。

  權威人士認為,騰訊創新上有點呆滯,呢個喺騰訊同今日頭條的對戰上反映出來。本來做開新聞資訊的今日頭條,早前開發短視頻平台抖音,並且火速崛起,被視為對騰訊一大挑戰。騰訊為此與抖音展開口水戰,甚至互聘公關鬥砌,但喺網上決戰,抖音就步步進迫。直至昨日,騰訊終於開始推出產品反擊,在全球合作夥伴大會上,騰訊正式發佈短視頻平台「有視頻」,產品定位為一至三分鐘的短視頻,重點聚焦於故事性微劇和微綜藝,目標用戶為注重個性與自我表達的年輕人群。

  在短視頻市場,騰訊明顯失了先機,被抖音搶灘成功,現時推出新產品,就要看看憑着龐大用戶群的先發優勢,能否扳回落後局面。騰訊在發展上,曾經憑微信打下大片江山,本來集團有野心想憑更佳功能組合衝出國際,可惜受到語文限制,加上國際政治環境無法成功,全球用戶人數被臉書持續拋離。騰訊其後開始思考出路,其中一個想法是在本地研發產品推出,變成入股或投資其他公司,這樣可能就形成自身在創新上減慢下來。如今集團在視頻戰線的策略能否殺出血路,係影響股價能否真正重拾動力一大關鍵。

終推「有視頻」硬併死敵

  在推出新服務同時,騰訊已在北京、天津等地啟動《王者榮耀》用戶強制公安實名校驗工作。從昨日開始,該工作將在其他省級行政區分六期依次進行,目標於11月內完成內地地區的全部覆蓋。雖然監管限制消息陸續有來,但在新產品發佈和大市反彈下,騰訊成功大彈10.8元,收報277.8元,升4%,跑贏大市。如果係好市的日子,單係靠新產品概念,已足夠佢炒升一大段。現時市場氣氛觀望,概念無咁好炒,但估計末來騰訊的「有視頻」同死敵抖音對戰的勝負,都成為左右市場睇法因素。

  喺呢隻重磅股帶動下,恒指重上25000關,收報25416點,急升436點;國企指數收報10279點,漲140點,成交增至1189億元。跌得多的內房股紛紛反彈,融創中國(1918)急升9%,收報23.2元;碧桂園(2007)升9.3%,報9.16元。手機設備股繼續炒反彈,舜宇光學(2382)急漲7.4%,收報73元。

陸羽仁

hd