金融High Tea——內地自強谷科企板

        美國中期選舉在即,市場等緊結果。港股上周五大升過千點,如我之前所講,主要係淡倉回補結果,由於美股升勢斷纜,市場自然要觀望,恒指昨日一度回吐700點,收市跌551點,亦係自然反應。

  短期股市跟隨美國今日舉行的中期選舉波動,由於特朗普作風飄忽,大家聽佢放出好消息或壞消息都唔敢盡信。中環茶友昨日話題係首屆中國國際進口博覽會喺上海舉行,國家主席習近平發表主旨演講時宣佈多項措施,反映中國應對美國打壓的中長期部署。

創板廢晒不支援科技

  中環茶友除咗留意到中國搞博覽會,展示內地會增加進口、對外懷柔外,亦特別注意到習大大提出,將在上海設立「科創板」。

  呢位熟悉科企的茶友話,內地咁搞有好有壞。好的一面反映內地對提升產業結構信心,無因為貿易戰減弱,反而仲有加快跡象。無咁好的一面,自然是從香港角度而言,上海加大力度搞科創板,會同香港形成競爭。香港今年開大門容許同股不同權新經濟公司上市,但市值要求係100億,另外打開細門容許市值15億的生物科技上市,都吸引咗唔少新經濟巨企掛牌,所以雖然港股大插,但港交所(388)股價仍然企喺200元樓上。

  不過,香港開閘容許科企以特別形式掛牌,卻有點生不逢時,好多公司上市破底,搞到焦頭爛額,好多投資者都話怕怕。若然上海加快開放,咁香港就要面對多一重競爭。

  其次香港畀創科公司上市的大閘,基本只開畀大公司,好多中小型創科公司根本唔會受惠。香港所謂創業板搞得太差,俾人濫用嚟做殼,結果要求愈來愈高,要上市前兩年有3000萬現金收益才夠資格上市,10間創科公司,九間半唔夠資格,夠資格上的,只是舊經濟如建築公司之類,失晒「創業」板原意。由於香港創業板廢晒,唔支援科技企業發展,內地自然好有空間再搞科創板。港交所昨日跌2.7%,多過大市的2.1%,亦係反映對香港上市生意流失的憂慮。

  茶友認為,內地搶科企板,第一個會影響嘅係美國納斯特克市場。中美經過今次貿易戰,科企都擔心喺當地上市的政治風險,若然上海加快開放,相信首先會影響嘅係美國,然後先輪到香港,有潛質嘅中小型科技回流內地上市,在變大前已流入其他市場。

  香港仲有少少賣點,就係市場自由度高,加上機制靈活。內地每逢股市跌,首先諗到就係叫停新股,對新股價格亦有限制。香港機制就寬鬆好多,比較容易調節。茶友話,近半年科企上市紛紛破底,主要係好多公司一早傾好上市價錢,後來市況唔對路,但都以舊條件做基礎上市,結果一上就插。

  最近,未有收入的生物科技企業嘅信達生物製藥(1801)在主板掛牌,首日收報16.66元,較上市價13.98元,上升近20%,有咁嘅表現,主要係個市調整差不多半年,投行新股定價開始反映市場,信達定價比開始,差唔多減咗三分之一,所以掛牌後就有得升,呢個就係香港市場的彈性。

  佢又坦言,股民對於呢類公司缺乏專家級認識,買股好多時都係跟紅頂白,所以買唔買新股,真係要先諗清楚對後市點睇,因為個市唔掂,咁新股價格就會相形見貴啦。

美數據強勁港匯添壓

  外圍待變,A股向下回吐,上證指數收報2665點,跌11點;深成指數收報7839點,跌28點。港股上周大升後回吐,恒指跌551點,收報25934點;國企指數收報10544,跌142點,成交925億元。反彈得勁的騰訊(700)回跌3.7%,收報292.4元;平保(2318)跌1.3%,收報78元;友邦保險(1299)下滑3.2%。

  內地繼續有政策出台,有人歡喜有人愁。國家能源局表示,未來三年國家對光伏產業仍將延續,強調光伏是國家重點支持的清潔能源,未來會得到更多支持,以及日後將相關政策加速出台,持續提供補貼。保利協鑫(3800)曾飆逾兩成,高見0.58元,收升19%,報0.57元;協鑫新能源(451)升11%,收報0.305元;信義光能(968)見五個月高位,高見2.91元,收升10%,報2.89元;北控潔能(1250)升8.5%,收報0.115元。

  深圳市土地房產交易中心補充公告指出,居民家庭新購買商品住房,自取得不動產權利證書之日起,三年內禁止轉讓。內房股跑輸大市,恒大(3333)挫7%,收報19.36元;碧桂園(2007)挫5%,收報9.02元;華潤置地(1109)跌4%,收報27.35元。

  喺觀望中選結果前,受美國就業數據強勁,加息預期升溫,港匯早段曾跌約0.2%,跌幅是超過兩年半以來最大,低見7.831水平。至於港元拆息全線向下,其中一個月拆息10連跌。金管局預計拆息回落,港匯有機會再觸及7.85弱方兌換保證水平,港匯弱都係港股潛在不穩定因素,大選結果同港元表現,有機會成為本周波動之源。

陸羽仁

hd