金融High Tea——小心美股或有選後效應

        美國中期選舉投票,今年因為特朗普做總統,此君特別多花招,所以中選非常熱鬧,好多女性都走出嚟投票。喺特朗普苦心經營下,美股喺選前造好,總算冇浪費佢大力發功,港股亦借勢重上26000點。要留意嘅係,美股谷咗幾日,喺選後會唔會停一停,唞一唞。

  今次中選雖然係國會之爭,但焦點仍然喺總統身上,初步估計,基層投票情況唔錯,估計係特朗普嘅支持者出動。同一時間,有報道話女性參選人同選民明顯增加,分析認為,女性選民對特朗普嘅大男人主義唔係咁認同,理論上對共和黨不利。

特朗普財演上身發功

  但有住喺美國嘅猛人就有唔同睇法,認為美國其實有保守一面,部份女性對特朗普唔係咁反感,甚至有部份係佢支持者。現時外界最普遍分析,係國會由共和黨完全控制,變成兩黨各自佔據一院,對總統形成牽制,但亦無法啟動彈劾。若然任何一黨能夠全面控制國會,咁就出現事前沒有估計到的黑天鵝。

  假如共和黨贏晒參眾兩院大多數,繼續一統江山,控制行政同立法機關,加上保守派佔多數的法院,相信特朗普就會全面催谷經濟同加強獨行獨斷作風,呢股旋風可能掃低新興市場同中港股市。相反,如果民主黨全面贏出選舉,就算唔彈劾總統,都會事事掣肘,但咁對股市未必係壞事。兩黨各佔一院就半生不死。

  選舉結果唔知開大開細,有一定要留意嘅係,特朗普喺選舉前出盡財演招數,既壓低加息預期,又同國家主席習近平打電話,連伊朗制裁都搞個特別版,放生幾個大國去入口伊朗原油,防止油價飆升。咁喺選舉之後,佢會唔會唞一唞呢?若然選舉效應過去,美股可能就回復番先前活動狀況,所以如果美股呢兩日造好,帶動大市反彈,咁短炒投資者就要留意係咪要出貨。

  由於外圍企穩,港股昨日繼續反彈,恒指升咗186點,收報26120點,重上二萬六關;國指收升87點,報10632點,成交縮減至812.31億元。滙控(005)獲平保(2318)增持,股價領漲,股價收升0.8%,報66.05元,中生製藥(1177)收升3.5%,報8.21元,係升幅最大恒指成份股。

  蘋果新iPhone需求欠佳,有傳蘋果暫停iPhone XR新增專門生產線計劃,加上蘋果評級被券商調低,藍籌手機孖寶受壓,為跌幅最大兩隻藍籌,舜宇(2382)收瀉3.8%,報75.5元;瑞聲(2018)收插3.5%,報60元。內房股繼續受富力(2777)準備發H股集資影響,富力股價繼續下插,收報11.8元,再跌2.8%。

富力折上折 賤物鬥窮人

  富力地產(2777)公佈,計劃發行最多8.06億股新H股,不超過經擴大後已發行H股股份約20%,而發行價不低於決定發行價之日前五個交易日,於港交所錄得H股收市價平均數80%。發行新H股的所得款項淨額,將全部用於補充本公司資本金,包括償還公司債務、補充公司營運資金等。

  由於今次發股比例唔低,加上定價機制會以五日平均價計算,有需要沽貨的投資者即時跳船,令股價即時由13元水平下插,估計短期會有壓力。不過,當沽售過後,股東預備將來認購新發的平股,咁壓力就會逐步消失。富力今年高位去到23.8元,O依家打咗五折,新股再打八折,等如高位嘅四折,平成咁真係有「賤物鬥窮人」之感。

  內地雖然力挺經濟同民企,但係房地產就不在此列,銀行對房企貸款仍然控制得好緊,加上賣樓回籠減慢,所以現金流普遍緊絀。中環茶友話,房企要派息,都要向銀行伸手,大股東為咗支持公司,要自己私人荷包出錢,所以好似富力嘅情況唔係單一事件,好似有關以深圳為基地的民企內房,資金都好緊張,要大股東撲水。

  由於內房銀根緊張,唔排除會再有集資行動,屆時就要批平股出價,所以想吼內房,要留意公司財政,比較穩陣嘅方法,係等到有平股出籠先去執。

陸羽仁

hd