金融High Tea——港交所密食當三番

        美國中期選舉告一段落,最後無出現黑天鵝,國會兩院由民主、共和兩黨平分秋色。同選前民調差唔多,參議院由共和黨勝出,眾議院由民主黨勝出,呢個結果唔算太意外。由於一味催谷經濟的總統特朗普日後可能會多咗掣肘,有分析就覺得略為利淡。

特朗普受制不利谷經濟

  今次中期選舉雖然特朗普不斷出牌,一時貿易牌、一時反移民牌,但仍然保唔住眾議院控制權。有說美國選民好古惑,唔傾向畀一個黨獨攬大權,所以總統勝選的政黨,好難繼續全面控制國會,特朗普都唔例外。

  睇番今次民主黨喺眾議院嘅得票,都算贏得清脆,有分析認為,咁係對特朗普施政成績打分唔算太高,唔多唔少影響佢爭取連任。另一個睇法係國會出現制衡,過往對股市唔係壞事,但由於特朗普以刺激經濟掛帥,又經常做財演催谷股市,失去眾議院會令佢推動政策無咁得心應手。學特朗普選前自己所講,選民想股市跌就投民主黨啦,呢個結果對股市影響應略為偏淡。

  今次共和黨喺選舉中,雖然失去眾議院控制權,但亦唔可以話輸得太多。喺選舉結束後,反而要留意市場焦點會點樣轉移。未來一段時間,外界當然關心中美喺貿易談判上的表現,究竟選舉過後,中美會否有較佳談判氣氛。正常而言,特朗普鬧中國拉選票誘因暫時應該消退。另一方面,美國如果繼續對中國貨品徵收關稅,甚至擴大徵收範圍,對通脹和消費者權益未必有好處,如果按呢個思路發展,貿易戰威脅短期應該稍為緩和。

  自從特朗普打出貿戰牌,港股由高位回落,交投平均跌番去千億元樓下。不過,港交所(388)昨日宣佈首三季業績,除息、稅、折舊及攤銷前盈利(EBITDA)按年增長32%,升至93.53億元,都算交出靚靚成績表,股價喺悶市中上揚1.2%,收報224.4元。

  港交所期內收入及其他收益升27%,至122.96億元;結算收入升33%,至47.4億元;股本證券及金融衍生產品收入升68%,至25.91億元。1月至9月,現貨收入按年升26%至30.33億元,當中交易費按年升42%,主要受新股上市集資的相關費用收入增加、來自滬深港通收益增加,以及產品組合改善帶動。另外,上市費亦增加13.3%,主要係上市公司數目增加,以及新上市公司數目和沒收申請數目,均較去年同期多。另一個推動收入增加因素,係現貨及衍生產品市場成交量增加,衍生權證及牛熊證數目增加,亦令上市費創新高。

  過往股票行業好受市況影響,港交所雖然係獨市生意,但都在所難免,但今年港交所成功推動同股不同權公司上市,加上無盈利生科公司掛牌,令上市生意好旺,公司市升又上市,市跌都上市,呢個狀況過往少見,所以今年經紀行業唔好做,好似中信證券(6030)就公佈上月淨利潤大跌77%,股價逆市受壓,收報14.88元,跌1.7%。其他內地劵商股亦向下,華泰證券(6886)跌1.48%,報13.36元。相反,港交所密食當三番,就繼續有唔錯增長。

  摩根士丹利同高盛,喺港交所公佈季績後發表報告,指第三季盈利勝預期。大摩認為,公司盈利變得穩定,相信可在弱市中有好表現,當成交量上升後,其盈利同估值會更好。O依家市場講緊明年可能有超過200間公司尋求上市,咁即係話港交所仲繼續旺場,由此解釋到點解雖然指數大跌,但港交所由300元邊跌落嚟,仍然守住喺224元,比好多券商股硬淨。

中美角力催谷科企上市

  內地同美國喺產業升級上角力,必然會大力推動科技公司上市,呢個係對港交所有利之處,但美國收水影響資金供應,就係不利大氣候。以港交所目前市盈率37倍,派息2.6厘,都屬於穩陣之選,但價錢偏貴,最好等佢略為回落到210元樓下先考慮。

  美國大選告終,市場睇緊美股會否借勢回吐,恒指波動唔大,收報26147點,漲26點;國企指數收報10641點,漲8點,成交973億元。外電報道,鈷生產巨擘嘉能可旗下剛果鈷礦,因產品發現放射性鈾,需要暫停開採出口;內地有色金屬股造好,推動個別金屬資源股突圍,洛陽鉬業(3993)一度飆升17%,見3.65元,創近三個月高,收報3.46元,仍升10.54%;該集團日前公佈首九個月大升1.6倍,至41.37億元人民幣。金川國際(2362)亦升7%,報0.79元。

陸羽仁

hd