金融High Tea——冠忠低吸有得博

        美國中期選舉完畢,美股大升超過500點,港股就明顯跟唔上。由於美國債息有上揚跡象,唔排除市況又去番美國經濟良好、債息上升壓住港股的情況。

  10月港股大插,理論部份空軍會考慮喺低位平倉食胡先,個市有條件炒反彈,只係新入市資金唔多的話,股份個別發展,落注唔係咁易買中。有中環茶友話,呢排港珠澳大橋搞到熱烘烘,以往呢類大型基建總會有啲炒作,但今次似乎出奇平靜,好似濠賭股冇因為澳門交通方便咗而受惠,股價都係浮浮沉沉,勉強都係得隻做跨境巴士的冠忠巴士升咗啲,點解會咁呢?隻冠忠又點睇呢?

港珠澳概念乏炒味

  港珠澳大橋搞咗12年先落成,若然同最先提出時比,時間相差仲遠,如果從當初貨運效益出發,O依家已經無乜用。若然以幾百億元去起橋,收路費肯定唔划算,要睇只能睇大橋帶來的經濟效益。香港股市無反應,主要有幾個原因,最直接係大橋項目主要係整個地區基建,無明顯直接受益者,譬如話有大把地的財團會間接受惠,但股票唔會咁易起哄。再者,今次項目係由內地主導興建,香港主要係出資,難度最高的海底沉管隧道都係由內地負責,香港無份之餘,仲要遲咗完工,所以香港冇點樣宣傳慶祝項目,就算係大橋通車,都係報咗兩日新聞就草草收場。

  同香港相比,內地人對大橋通車熱情高漲好多,皆因內地央視過去幾年都有節目介紹大橋工程,好多人覺得呢項世界級建設好勁,所以大橋一通就每日有成10萬人南下觀光,呢種自豪感香港人感覺唔到,股民自然亦冇領悟到,所以炒作興趣唔特別高。

  內地人湧去東涌,結果變咗社區問題,大批旅客湧去東薈城,本來幾個財團太古、恒隆等係區內大業主,但因為佢哋公司咁大間,一、兩個項目有得益,暫時仲拉動唔到公司估值。唯一較為受惠的,是有機會做巴士生意的冠忠。公司股價喺通車前後明顯跑贏大市,創出一年新高,得益相對明顯。

  至於冠忠股價升完未、是否完全反映通車效應?從公司管理層講法,集團計劃開設香港至珠海的直通巴,票價由120至140元,定價較船飛220元為低,有一定競爭力。通車後巴士載客量可達七成,若然所有班次載客全滿,大橋通車將為公司貢獻每年8至9億元收入;同時又會積極與中港旅遊業界,推廣港澳深珠四地旅遊。

  港珠澳大橋現時主要係用集體運輸,由三地口岸點對點的金巴,同埋直通巴士兩種不同方式載客。直通巴士可直達市區,好大機會取代船運。

  公司講法都講得幾美,因為冠忠現時一年生意額係23至24億元,若然可以增加8至9億元生意,咁將會有近四成增長,對盈利相當有幫助。

  究竟大橋推動力有冇咁勁,O依家直巴未開,所以仲要觀察。單講計數,冠忠呢輪股價炒高咗近20%,O依家市盈率八倍,去年盈利下跌24%,估值只係不過不失。考慮到佢往績尚算穩定,加上派息有五厘,遇到股價回落番啲吸納等直巴開通,應該都有可博之道。

  至於大市表現就相當悶,恒指高開一度升逾200點,但A股先揚後挫,上證指數四連跌,收報2635點,跌5點;深成指數亦先升後跌,收報7698點,跌54點。恒指喺A股低收下一度倒跌,收報26227點,升80點;國企指數收報10703點,漲62點,成交縮減至945億元。大股中港交所(388)繼續上揚1.2%,收報227元;中國移動(941)升2.75%,收報74.85元,發揮咗支撐大市作用。瑞聲科技(2018)逆市急跌7%,收報55.8元;銀娛(027)跌3.8%,收報44.25元,回調幅度都幾「甘」。

陸羽仁

hd