金融High Tea——白宮水暖豬先知

        美股跌開有條路,相反港股升開唔肯停。杜指隔晚再跌205點,港股開市唔肯跟跌,下午上揚,最後靚仔高收,港股勁彈448點,頗有吐氣揚眉嘅感覺。

  美股跌,港股升,呢種反向關係同10月明顯唔同,除咗因為10月美股造好,港股超跌形成估值差距外,選後形勢中美關係改變都有影響。如果用番特朗普邏輯,邊個股市跌,代表邊個喺貿易問題上有讓步需要,美股呢排出現「選後疲憊症候群」,咁美國就大有需要同中國傾成貿易協議提振股市,令市場對兩國至少短暫達成協議日漸樂觀,香港股市就由超跌中反彈,形成美股跌、港股升嘅新現象。

萬洲股價11月神奇見底

  美國總統特朗普喺中選前夕開始少打中國牌,最近更加少提,外界估計會唔會係佢下邊嘅官員正在密密做嘢呢?正如之前拆局,美國O依家同中國打貿易戰,徵稅既增加通脹,又影響美國人消費,計落唔係幾着數,反而見好即收,留力日後再玩方為上算。O依家美國股市大跌,對特朗普更加多咗個考慮,因為中美若然鬧翻,美國要加辣對付中國,對股市點計都唔係好消息,萬一搞到美股再插,豈不是弊傢伙?所以佢用股市來衡量貿易談判嘅金句,O依家用番喺自己身上都應驗嘞。

  中國對貿易談判嘅立場,一向都係希望達成協議,噚日國家商務部發言人高峰喺例行記者會上表示,中美兩國元首通話後,經貿領域已經恢復通話同溝通,中方期待通過對話,妥善解決中美貿易摩擦問題。佢仲透露工作團隊正在保持密切接觸,以認真落實兩國元首通話達成的共識。中國向來無問題,所以白宮願意合作,雙方就有機會停火。

  有中環茶友留意到,美國國會「美中經濟與安全審議委員會」發表報告,引用特區政府取締提倡港獨的香港民族黨、拒絕香港外國記者會(FCC)第一副主席馬凱工作簽證續期、高鐵西九站實施一地兩檢、回歸後首次拒絕美國引渡逃犯要求等例子,形容香港言論自由持續受壓。報告認為,北京政府持續侵蝕香港政治制度,要求美國商務部檢視美國對港科技出口政策。喺中美貿易談判前夕,又會唔會有負面衝擊呢?

  呢位茶友係政治發燒友,但我話要明白美國O依家外交政策叫做「美國優先」,即係利益最緊要。《華盛頓郵報》記者懷疑俾沙特皇儲派人喺領事館肢解,特朗普都預先講明唔會停止對沙特售武,皆因呢單係大買賣,所以本月「習特會」最重要係講實利同政治好處,如果保持目前港美關係無着數,咁香港咪有問題囉,如果有着數,咁就乜嘢問題都無,關鍵係點畀着數美國而已。

澳門派錢沖喜銀娛

  茶友要觀察中美關係,可能要去睇隻豬肉股萬洲(0288)。呢隻豬肉股去年成為新貴,本來表現唔錯,無啦啦因為特朗普打貿易戰,集團喺美國業務可能受影響,怕出口返中國要畀貴稅,於是股價率先下插。不過,到咗11月美國選舉臨近,萬洲股價就見底,之後雖然內地有豬瘟負面消息纏繞,佢股價都唔再下跌,之後仲大幅反彈,昨日收報6.47元,大升逾4%。佢嘅股價表現直頭係跟住美國中選嚟走,你話神唔神奇?呢啲可以叫做「白宮水暖豬先知」,賣豬肉嗰個可能知得快的。特朗普玩乜好難估,所以政治市係大戶賺錢專利,好似萬洲呢啲政治敏感股份,買佢要膽大心細兼消息靈通,但唔炒佢都可以觀察佢走勢,可能準過好多政治分析家。

  中港股市昨日齊升,但港股升幅仲跑贏少少。人仔都造好,中國外匯交易中心公佈,人民幣兌美元即期升破6.94元關,全日收市揚150點子,報6.9359兌1美元。內地股市率先高收,上證指數收報2668點,升咗35點,升1.4%;深成指數收報8002點,漲93點。港股跟隨向好,恒指收報26103點,升448點,升1.8%;國企指數收報10555點,漲150點,成交863億元。大市向好,騰訊(700)藉佳績大反攻,股價急升5.8%,收報288元。澳門特首派錢加碼到一萬,可能有沖喜效應,銀娛(027)急升5.7%,收報46.95元。同主席聯手投到啟德地的高銀金融(530)午後升幅擴大,收升14%,報3.37元。

陸羽仁

hd