金融High Tea——年尾前阿爺料再降準

        美國股市不斷洩氣,科技股繼續係拖低大市主因,加上虛擬貨幣大插,種種現象反映資金由概念性資產撤退。

  美國科技股前晚幾乎全面下插,代表科技股嘅納指大插3%。今年初中美科技股大升,虛擬貨幣兌美元屢創新高,比特幣上破19000美元水平。當時陸羽仁同中環茶友討論炒風何去何從,期間市場出現的現象是,市盈率愈高股份愈炒得勁,連市盈率都唔睇嘅虛擬貨幣炒風更烈,當時現象係愈是無數計嘅資產愈有概念,愈受市場追捧。

  這種現象經茶友間熱議,結論係似曾相識,有啲2000年時科網股嘅味道。只係如今部份科網股業務遠比當年穩固,具備大企業條件,但很多概念性資產,主要是建基於龐大資金供應上。這種炒風幾時停止,決定因素唔係估值,而係資金供應幾時無以為繼。

虛擬資產 水退就喎

  現在返轉頭睇,呢類資產嘅高位,喺鮑威爾取代耶倫出任聯邦儲備局主席時已經出現,因為佢比耶倫表現得更加鷹派。隨著資金供應收緊,呢類缺乏回報保障嘅投資變成火棒,接者陸續損手。《華爾街日報》呼籲聯儲局小心加息,間接等同向科技股和虛擬貨幣示警,加劇他們大跌。未來呢啲資產表現,好睇儲局加息決定。若然美息繼續向上,相信科技股同虛擬貨幣未必能夠止跌,就算美國停止加息,部份呢類風險偏高資產,都好難保證短期內有像樣回升。

  美國經濟前景意見漸趨分歧,甚至全球增長都開始有陰影。高盛資深中國經濟分析師鄧敏強喺記者會上表示,雖然近期內地出口表現不俗,但有機會係因為廠家憂鬱中美貿易關稅問題而提早出貨,加上明年首季,美國有機會向2000億美元中國貨加徵25%關稅,相信對中國出口影響大。而且內地樓市交投減少,消費減弱,所以預期中國經濟有機會於明年首季觸底,到按年增長5.8%水平。若然貿易摩擦再度升溫,明年第二季離岸人民幣或要低見7.35水平。

  他又預期,年底前內地會再降多一次準,幅度為50個基點。明年第一季及第二季預期會再各有一次幅度為50個基點的降準。

  該行亞太區首席經濟分析師迪安竹(Andrew Tilton)表示,明年環球經濟料會持續增長,亞洲區(日本除外)於明年經濟增長約6%,較今年少0.2個百分點。其中,中國及香港明年經濟增長,分別為6.2%及2.6%,分別按年減少0.4個及1個百分點。高盛仲估計,現時至明年底,美國會加息五次。鄧敏強表示,香港會否跟隨加息,要視乎資本外流速度而定。他稱,美國加息後,香港銀行同業拆息(HIBOR)亦會上升,但仍會低於美元LIBOR水平。

  從高盛呢間美資大行預測,明年經濟不確定性都幾大,而且偏向負面發展。若然美息真係再加五次,對資產市場衝擊唔細。高盛講到儲局政策咁鷹,甚有淡聲淡氣之感。

  外圍市場氣氛弱化,加上港股連漲三日後,恒指開市即現回吐,迅速失守26000點,恒指最多跌595點至25776點,收報25840點,瀉531點;國指收挫165點,報10466點,成交775億元。外圍科技股唔掂,騰訊(700)收挫3.3%,報281.6元;友邦(1299)收挫4.27%,報62.75元,兩股共質低恒指182點。

蘋果一倒 板塊凋零

  其他成份股方面,石藥(1093)周一中午公佈首三季業績,其後遭多間大行唱淡,收挫5.26%,報16.2元,是表現最曳藍籌股。《華爾街日報》報道,蘋果大幅下調9月推出的三款新iPhone生產定單,股價隔晚挫近4%。蘋果概念股成個板塊大樹飄零,瑞聲(2018)收挫3.7%,報53.95元;高偉(1415)收跌3%,報0.96元;比亞迪電子(285)收插5.9%,報10.6元;舜宇(2382)收挫2.38%,報75.75元。

  喺科技股普遍大插下,小米集團(1810)因為第三季扭虧為盈,股價以接近全日高位收市,收漲8.4%,報14.74元。此外,小米獲美圖(1357)往後絕大部份美圖品牌手機及其智能硬件全球獨家授權,僅須把日後毛利分成10至15%予美圖。美圖發盈警,料全年淨虧損擴大,收挫6.44%,報4.07元。

陸羽仁

hd