金融High Tea——華為警號 唔好信晒一邊

        「習特會」告一段落,大家估計未來有90日停火期,突然之間爆出美國要求拘留及引渡華為創辦人任正非的女兒孟晚舟,理由係涉嫌違反依朗制裁。事件曝光後美股杜指期貨即刻插低,港股聞訊低開,一度大插超過8百點,中美貿易風險再令股市風雲色變。

  中美談判達成框架協議,雖然大家都估事情都唔會順風順水,但無諗過咁快就會有壞消息爆出來。內地反應係要求放人,但美國自然唔會咁順攤,孟晚舟已成為美國手上人質,同中國談判時多件籌碼。

  港股因為突然爆出呢單消息急插,有中環茶友相當不滿,話美國喺伊朗問題只許州官放火、不許百姓點燈,自己想點就點,鍾意就話人違反制裁施加懲罰,自己覺得無着數又可以期限到時突然放寬限制,任指定國家同伊朗買油做生意。

時間推斷習特會前已郁手

  茶友大發牢騷,但國與國交往就係咁現實,無論係領導人抑或投資者都只能面對,作出研判。睇番今次加拿大動手拉人,時間係12月1日,事件需要兩國協作,估計之前也需要若干時間,換言之,從時間上推斷,決定郁手係「習特會」之前,加拿大幫手拉人之日係「習特會」同一日。即係話美國無論習特會成果係點,都已經預咗出招。如果從呢個角度睇,中美貿易談判、習特會與孟晚舟被捕係沿着兩條線發展,兩者有關但未必相連。

  中美關係趨向緊張,貿易摩擦係一個因素,呢方面的矛盾相對易解決。另一條線係中國經濟及新興產業崛起,開始挑戰美國,所以今年初就爆出中興(763)違反伊朗禁制令事件,其後中興被人剝層皮然後甩難,但今次華為事件就成為延續。

  華為係近年崛起最快的內地科企,喺5G機站同手機領域都強勢進佔市場。本來外界最關注係其電訊基站業務,無諗過公司發力進軍手機,竟然成功打進高檔市場。今年蘋果新機銷情呆滯,部份原因都同華為推出性價比甚高的高檔貨有關。

  華為威脅咁大,所以最近美國已出口術,要求其他國家以安全理由不要使用華為的電訊設施,現在話擔任華為高層的創辦人女兒違反制裁,可視為包圍行動的一部份,但就算沒有呢一步,相信打擊華為都不會變。

  美國喺「習特會」前叫加拿大作出照會,令人好奇特朗普是否知情。從特朗普見完習近平後猛發帖文唱好,正路睇政府官員可能無向他作出通知就自己行事,身為總統事前不一定知情。但若然特朗普知情,他的演技就真係爐火純青,到達影帝級數。不過,特朗普是否知情不是太重要,因為呢次行動反映了美國的國策,分別只是總統控制到幾多而已。

  從市場反應,港股一開大插,之後跌幅略為收窄,市場觀望氣氛再度轉濃。今次事件令人再度意識中美地緣政治風險,而且形勢變幻甚快,處於這種變幻原是永恒的市況,掌握消息的大戶,必然把握機會一下其手,投資者很難抱持一成不變的策略。從兩國互動來說,若然美國未來樣樣順風順水,對內地壓力就有增無已,相反,若然美國環境轉差,經濟惡化,即時會令投資市場有波動,但咁境況打起交來都無咁兇狠,情況反而好一點。華為事件再響警號,在呢啲市,識得執生,唔好死牛一邊頸信晒一邊,一定無錯。

  喺呢種境況入市必然要留有餘地,招式不能用老,搞到自己去盡無得應變。係陰晴不定環境,通常會出現逃至優質資產的現象,即係前景穩定的資產會較受歡迎,何謂優質資產,即時收入穩定,派息和變現能力強的資產,如果買股的話,有無穩定派息能力都係重要考慮之一。

醫療板塊禍不單行

  喺孟晚舟事件衝擊下,港股低開514點報26349,午後曾大瀉803點,見26016,創11月23日以來新低,尾段跌勢略回穩。恒指最終收報26156,跌663點,兩日累瀉1103點;國企指數收報10480,跌276點,成交額970億元。藍籌股普遍受壓,騰訊(700)大跌逾5%報304.2元。華為同行中興通訊大插5.9%。與華為有業務關係的手機設備股及軟件股重創,周三已遭大摩唱淡的舜宇(2382)股價續跌,插5.5%收報69.95元;瑞聲(2018)跌幅相約,收報51.55元;華為軟件服務商的中軟國際(0354)插12%報收4.07元。

  禍不單行,由國家醫療保障局推動的帶量採購試點預中標結果出爐,價格大幅低於藥企預期,拖累醫藥股全軍覆沒。中生製藥(1177)插16%收報5.84元;石藥(1093)跌15%報收13.82元;綠葉製藥(2186)、復星醫藥(2196)、三生製藥(1530)、金斯瑞(1548)全部跌超過一成。

陸羽仁

hd