金融High Tea——新創建食肥肉等消化

        2018年過去,新一年又開局。新年之前,美國總統特朗普大力為股市打氣,透露同國家主席習近平傾長氣電話,雙方喺貿易談判上傾得好好。搞風搞雨的美國總統見到美股大插就放出利好消息,刺激港股喺舊年最後一個交易日交到貨,收市升341點。

  全球股市去年樣衰,一大原因係特朗普要喺全球打貿易戰,特別係針對中國,搞多幾搞,令全球景氣蒙上陰影,第四季市場信心明顯惡化。佢喺年尾知衰放軟身段,但港股升幅唔算太強,成交亦唔多,皆因大家都知此君反口覆舌,今日造好,不知哪日造淡,所以大家都只係信佢兩成。

  另外,中國周一公佈12月官方製造業PMI是49.4,預期是50,上月前值則為50.12,是2016年7月以來首次跌破榮枯線。

二線內房股炒放寬

  國家統計局解讀指出,12月市場需求下行壓力加大,企業預期趨於謹慎;外部環境變數較多,內部需求放緩,近期進出口景氣度下降。

  內地經濟放緩浮面,有行走內地的中環茶友估計,在農曆年後唔少企業會趁春節假期裁員,失業情況會加大。經濟乏力,市場憧憬內地放寬樓市政策,假前一眾內房股受追捧,尤其是二線內房升幅顯著,物業管理股同樣造好。內地增長放緩,對全球都有影響。O依家美國投資界紛紛發表利淡睇法,變相向聯儲局施壓,質疑主席鮑威爾加息太快。傳統上,美股有一月升市說法,今年就相當難講,估計開局就有可能先有一輪顛簸。

  舊年恒指係先高後低格局,除夕收報25845點,升341點,但全年累挫4073點。要留意嘅係,期間高低波幅8943點,喺1月26日見歷史高位33154點,到10月則創24540點年內低位,由高位下瀉近27%,當中經歷過10月小股災及36年最長跌市,是過去七年表現最差的一年。恒指單喺第四季已跌1942點,跌到投資者焦頭爛額。國指除夕則收報10124點,全年累挫1584點。

  個股方面,藍籌以華潤置地(1109)表現最佳,升幅達31%,收報30.1元。內房能夠喺中央收緊樓市政策下跑出,都有爆冷味道。申洲國際(2313)同中華煤氣(003)則緊隨其後,升幅分別為19.3%及16.3%,收報88.75元及16.2元。華潤有官企背景,說明舊年做生意都係官企好過民企。今年至少上半年,相信潮流都仲係打穩陣波。

要留意美股遲跌過港股

  表現最差藍籌就係陸羽仁近兩年長期看淡的瑞聲科技(2018),跌幅達67.4%,報45.45元;吉利汽車(175)及中生製藥(1177)為跌幅榜中的第二及第三位,分別跌49.08%及43.99%,收報13.8元及5.16元。

  重磅藍籌股騰訊(700)曾升至歷史新高476.6元,亦曾低見251.4元,最終收報314元,全年累跌22.66%;滙控(005)收報64.8元,全年累跌18.95%。

  特朗普喺美股2018年最後一個交易日前發功,借中美貿易談判取得進展消息提振,三大指數造好。杜指收報23327點,升265點;標指收報2506點,升21點;納指收報6635點,升50點。如此升幅同香港一樣都係有點應酬式,喺特朗普大力唱好中美貿易談判前景時,只係升雞碎咁多。總結全年,美股杜指、標指、納指分別累跌5.6%、6.2%和3.9%,均為10年來最大年度跌幅。單計12月,杜指和標指分別跌8.6%和9.1%,齊創自1931年經濟大蕭條以來最差的12月表現。納指全月則累跌9.4%。有中環茶友話要留意,美股下跌比港股遲差不多半年,恒指喺去年10月創全年低位,咁係咪代表美股未跌夠呢?

  元旦前,政府宣佈經過公開招標程序後,批出啟德體育園設計、興建及營運合約予新世界(017)及新創建(659)專為園區發展而成立的Kai Tak Sports Park Ltd,合約期為25年。主場館外觀設計亦正式曝光,會以「東方之珠」為設計理念。外界可能覺得呢件係肥豬肉,所以有人話特首林鄭月娥上場後,成日益集團大股東鄭氏,仲話林鄭整個大荷蘭水蓋畀主席鄭家純。政府之後即刻出來澄清,話純官個荷蘭水蓋並非由她上任特首後頒發。

  純官惹起誤會,皆因近期集團好勇,拎咗唔少政府項目。除咗體育園外,仲有喺幾個月前投得航天城,恍如係大好友。但係細心一睇,體育園風險唔大而且長期有收入,都算係一個好項目,不過呢個項目要有一定資本承擔。新創建債務現時處於可接受水平,股價就表現強勢,已經跑贏大市,如今食埋件肥豬肉,收報16.06元,回調1%,有機會要消化一下先。

陸羽仁

hd