金融High Tea——投資增值還看內地

        美股焦點繼續落喺業績,由於焦點股公佈業績對辦,華爾街隔晚繼續反彈之路,杜指升141點。恒指早段表現尚可,但係有小型內房股午後暴瀉,佳源(2768)一度挫近九成,收報2.68元,跌八成;陽光100(2608)閃跌75%,收報1.31元,跌64%,拖累港股收市跌149點。

三四線股急插傷氣氛

  美企派出來嘅成績表暫時不俗,大行高盛宣佈靚靚業績,股價創出10年來最大單日升幅,躍升超過9%,提振美股氣氛。同一時間,聯儲局褐皮書披露經濟仍然溫和增長,但增速同時有放緩跡象。美國呢段時間唔係炒經濟強勁,而係炒央行不敢勒緊水源,所以大市維持反彈。

  外圍企穩,港股開市跌後回升,但個別三、四線股閃跌,對氣氛即時有影響。恒指最終收報26755點,跌146點;國企指數收報10512點,下滑43點,成交金額974億元。

  藍籌普遍回落,中港地產股走弱,碧桂園(2007)收挫3.48%報9.44元,為跌幅最大藍籌股;中國海外(688)跌3.21%報27.15元;信置(083)跌2.92%報13.98元。國壽(2628)跌0.11%報18.42元;建行(939)降0.15%報6.56元。

  汽車股表現兩極,東風(489)升1.18%報7.74元;吉利(175)獲瑞信看好,股價升0.69%報11.6元;華晨(1114)升0.15%報6.78元。新能源汽車股比亞迪(1211)遭大摩唱淡,股價挫6.07%報43.3元。

  1月全球股市暫時炒住救市先,內地出招穩住經濟成為主旋律之一。阿爺放水有得炒,但好似佳源呢類內房股仔,投地比較勇,財務壓力大,又批過股,一有異動就大插。喺呢種危中有機、機中有危的環境,應該點揀股呢?陸羽仁同喺內地發跡嘅富豪討教,究竟點樣投資至可以賺得最多。富豪O依家一身銀,公司喺香港上市,業務分佈中港,本身有大把資產喺海外。

  佢施施然話,香港做生意,一個字講完,就係慢。這個情況冇辦法,因為香港章則制度多,要走完程序要好長時間。香港官員好處係唔會貪,但也唔見得會同你傾,所以任何事都冇得商量,唔會有突破性想法。

  但喺內地做生意競爭大,波動性高,但勝在速度快,一個項目一兩年間就完成,中間仲可以好快套現,所以內地資產增長快。佢舉例喺2009年金融海嘯時,好多內房公司由高位下調近九成,之後大幅反彈,但部份跌得太勁,雖然後來大彈,部份至今仍然未返到家鄉,買咗嘅股民亦可能斬倉出局。所以如果講穩陣,當然係香港,但若然要講增值,講機會,都係內地多啲,但回報高就要面對波動大嘅問題,當中就要講防險之道。

揀股防險不宜太進取

  富豪認為,中美O依家有爭拗,但從雙方經濟睇,和則兩利,所以解決機會相對高。中央O依家推動大灣區,喺呢幾個內地二線城市中,O依家地價平,增速相對快,值得留意。

  佢仲總結多年經驗,喺內地做生意賺錢快,但同時要注重防險,皆因內地政策變得快,若然一時周轉唔到,就會出局玩完,所以一定要留意現金流,避免被人逼倉,靚資產都被逼賤賣。

  按照富豪教路,陸羽仁整理出一個揀股方法,就是買內地主要可以左右經濟大局,政府要重視嘅行業龍頭,譬如好似銀行同地產股,唔好買太勇猛嘅公司,而係選取適度進取嘅大公司買,高時減持、低時又買吓,可以係進取不忘穩健嘅增值方法。

陸羽仁

hd