金融High Tea——大新買起自己有得跟

        美股陸續公佈業績,成為短期大市指標。對上一日美企公佈業績靚仔,杜指一度爆升超過300點,收市升171點。

  企業業績好壞,其實倒後鏡睇嘢,主要反映過往嘅事。美國去年經濟強勁,第四季開始先有啲放緩,所以盈利表現大致不俗,但今年開局先受提高關稅影響,跟住就到美國政府停擺,O依家分析家普遍擔心首季增長,甚至估計可能會因為政府冇錢使導致零增長,所以市場對於企業盈利反應,變化可以好快,個別公司業績反應好,下次可能又會變。

油股油服股齊升

  美股造好,對港股帶動唔多,大市反而喺U盤嘜高,以全日高位收市,收報27120點,升112點;國指續揚,收報10691點,升59點。美國又喺產油國委內瑞拉攪局,承認人哋反對派議長做「臨時總統」,委內瑞拉宣佈同美國斷交。委內瑞拉係主要產油國,可能因為咁樣怕美國制裁委內瑞拉,油股表現不俗。「三桶油」以中石化(386)最好,走高2%,收報6.25元;中海油收升1.4%,報12.8元;中石油(857)收漲1.02%,報4.95元。中海油(883)計劃擴大資本開支,油服股普遍受追捧,中海油系的中海油田服務(2883)收飆7.7%,報7.67元;宏華(196)收揚10%,報0.51元;安東(3337)收飆7.14%,報0.9元;中石化油服(1033)收升3.13%,報0.66元;華油(1251)升5.3%。

  投資氣氛不定,資金繼續追入公用及收息股。領展(823)再創新高,高見83.5元,收升0.8%,報81.65元;長江基建(1038)收升1%,報62.4元;延續升勢的煤氣(003)再創新高,見16.98元,收升0.35%,報16.98元。

  市場話題集中喺賭股,由何超瓊任主席嘅信德集團(242)公佈,澳娛幾個股東簽訂協議,喺控制澳娛多個範疇上共同進退。有關股東包括持有澳娛26.576%股權的霍英東基金會及以何超瓊為首的何家成員,共持澳娛逾五成三股權。而澳娛則持有澳博約54%股權,全面掌控整個王國。

  今次聯盟目標多方面共同合作,包括爭取延續澳博嘅博彩牌照,以及維持澳娛作為持有澳博逾五成股權的大股東地位,聯盟同時會喺澳娛同澳博人事任命上共同進退。由於協議成員唔包括持有澳博8.62%嘅「四太」梁安琪,亦唔包括「三太」陳婉珍,亦都冇提及兩人,故此估計未來澳娛同澳博,會以霍英東基金會同何家二房為主。由於今次聯盟明言以延續賭牌為目標,霍英東基金會係當地慈善基金,入主對續牌應有好處,加上聯盟講明會加強管治,所以市場對行動反應正面。信德收報2.72元,升5%;澳博(880)收升8.2%,報7.79元。

  澳門O依家有六家博彩公司,未來賭牌會陸續到期,究竟係咪可以獲得續牌存在不明朗因素。O依家澳博首先出現變化,管理層會再執位,提升管治,進行強化,好明顯係加強應對,其他博彩公司照計都唔可以袖手旁觀,就等阿爺自動續約,送個印鈔機畀大家印錢。

  除咗澳博股東出現重組外,個別公司都有動作。大新金融(440)公佈,以總代價不超過5.92億元,向主要股東MUFG銀行回購其持有的1550萬股,佔該公司已發行股本約4.63%。交易完成後,購回股份將轉讓予該公司註銷,MUFG銀行持股將由15.18%降至11.07%。大新金融今次回購,然後將股價註銷,有助提高資產淨值。O依家市場波動,要搵好投資唔容易,大新金融可能覺得與其做其他投資,不如投資喺自己身上,所以回購股份。消息公佈後,公司股份即時彈上7%,收報41.45元。

唔怕悶可以低吸

  大新金融主要資產係持有大新銀行(2356),過去集團仲有人壽業務。兩年前集團出售人壽保險業務,作價106億元,買家係內地金融企業泰禾保險,交易帳面盈利為35.28億元。交易完成後,大新金融派發咗約20億元特別紅利,所以集團手頭資金相當充裕。

  手頭現金除咗派發紅利外,部份用嚟加強大新銀行資本,O依家又用嚟買返公司股本註銷。大新金融每股資產淨值有74元,以現水平買入有四成折讓,同時可以提高每股盈利,咁可以理解為管理層睇好自己,所以用資金買返部份股權。大新喺年前藉住派發紅利,股價曾炒過上60元水平,O依家回落到41元,價錢唔算貴。呢類公司欠缺爆發式增長,屬於悶股,但優點係輸極有限,由於40元樓下公司都出手增持,貪穩陣嘅小股民可以此為界,買嚟先收息再博賺價。

陸羽仁

hd