金融High Tea——一出官門游大海

        「習特會」推遲,即時打窒豬年紅盤,不過中美同意繼續接觸,美國貿易代表萊特希澤同財長努欽率團抵達北京,將會同中方喺周四(14日)舉行新一輪貿易磋商。有傳特朗普計劃月內同國家主席習近平傾電話,並最快喺三月中旬會面。消息令投資氣氛轉好,恒指企穩二萬八樓上收市,收報28143點,漲197點。大市成交金額增至881億元。

恒指跟住A股高收

  市場借住中美貿易消息炒上,陸羽仁就認為兩國談判仲有問題要解決,消息可好可淡。港股噚日愈升愈有,反而同憧憬內地放水減息關係大啲,跡象之一係人民幣匯價喺豬年走軟。中美貿易關係向妥協發展,理論上人仔應該硬淨,O依家匯價偏軟,合理解讀係市場預期內地利率有機會調低。睇番內地,A股豬年首個交易日迎來「開門紅」,並以接近全日高位收市,上證指數收報2653點,升1.4%;深成指數收報7919點,勁升3.1%,反映帶升港股動力係內地因素。

  恒指走勢同內地接近,大市低開高走,U盤嘜高至全日高位收市;國指亦向上,重上11000關,收報11016點,升60點。當中騰訊(700)收升1.9%,報352元;平保(2318)收升1.2%,報77.35元,兩股領漲大市。

  5G股繼續當炒,深圳今年率先開展5G商用試點,預計新增100M及以上光纖接入用戶數85.1萬戶,5G基站數1955座,部份5G股向好。京信通信(2342)收飆10%,報2.11元;中興(763)收升3.7%,報16.4元;昂納科技(877)收升3%,報3.97元;鐵塔(788)收升3%,報1.67元。

  大市持續反彈,新經濟股開始追落後,美團(3690)連彈七日,收飆8%,報62.4元;上周五急彈嘅美圖(1357)再漲6%,收報3.26元。小米(1810)一項外觀設計專利喺世界知識產權局(WIPO)嘅全球設計數據庫中發佈,該專利展示一款四曲面智能手機,屏幕完美對稱,成部機冇按鍵。市場預期小米或會將呢項專利用喺今年發佈嘅MIX 4手機上,小米股價曾升至10.9元,收漲4.3%,報10.7元。新經濟股缺乏護城河,最忌無水要防守嘅市況,趁住銀根轉鬆,呢個板塊好多股價跌咗超過一半,單炒反彈水位都已經唔少。

  中環茶友喺春節前入咗貨,O依家玩玩換馬,基本上唔急於食胡。大家口痕話題,係立法會議員葉劉淑儀同麥美娟用私人草案,建議立法規管領展(823)商場舖位租金加幅,搞到領展逆市收跌0.3%,報86.6元。茶友笑言,葉太咁樣出招,除咗覺得打領展有分攞,多少都有啲玩師妹特首林鄭月娥嘅味道。

  林鄭未做特首前,曾經形容領展係影響民生嘅「三座大山」之一。但佢上任之後,似乎到O依家都未做到啲咩,莫講係愚公移山,直情石頭都無移一嚿。既然今年係區議會選舉年,葉太又同呢位AO師妹感情唔係特別好,實行老實不客氣整色整水玩吓佢。

  眾所周知,議員提出私人草案成功立法機會極低,特別係規管商業活動,領展雖然有前身係官股嘅原罪,但近年不斷賣產擺脫昔日陰影,賣走嘅商場更加唔關自己事。O依家議員出招都係擺姿態居多,相信對領展影響有限,公司股價逆市下跌,主要都係累積升幅太多。

港鐵可做今年豬膽股

  租管難郁政府一股不持嘅領展,咁另一座大山港鐵(066)又如何呢?港鐵喺過年前,再爆出有其他工程記錄唔見咗,似乎未行完衰運。不過,陸羽仁同熟悉港鐵嘅猛人傾起,佢嘅看法好簡單,O依家港鐵危機係政治風險,多過財務風險。港鐵出事,主席馬時亨同行政總裁梁國權都會離任,O依家壓力最大係政府。港鐵收咗80幾億管理興建沙中線工程,但點樣賠償合約條文有封頂,唔會賠太多,基金股東定過抬炸彈,所以港鐵股價喺風波中幾乎不動如山。如果連同先前派嘅特別息,港鐵差唔多企喺歷史高位,根本未驚過。

  坦白講,官方機構上咗市,等如放虎歸山,一出咗去就好難約束,領展固然如此,就算政府仍然係港鐵大股東,但因為有公眾股東做持份者,政府大力鍊死港鐵固然好難交代,同時亦令庫房嚴重受損,所以政府只能按商業原則辦事,喺政治上就盡量同港鐵切割。

  未來港鐵有上蓋物業陸續入帳,陸羽仁聽完猛人拆局,覺得此股雖然跑得慢炒味唔濃,是非多,股價唔算平,但有逢壞消息等佢跌時吸納,都可以做今年豬膽股。

陸羽仁

hd