金融High Tea——中國狂牛唞唞氣

        上周五中港股市齊插,恒指跌551點,收報28228點,跌幅1.9%,算係近期較大幅度調整。不過相對內地股市,港股跌得唔算多,當日上證指數勁插136點,不但跌穿3100點,連3000點大關都守唔住,收報2969點,跌幅達4.4%。內地股市跌幅比香港大,應驗咗股市升得急就會跌得快嘅定律。

  當日跌浪橫掃完亞洲後,去到歐美就開始退潮。美股開市前公佈2月美國非農就業數字,新增職位僅2萬個,遠差過市場預期嘅18萬個同及1月嘅30.4萬個,係17個月以嚟最低。差勁嘅就業數字,令杜指期貨開市前已跌逾200點,杜指早段最多跌過220點,其係跌幅收窄,最終微跌22點,報25450點。美股跌得少,相信係因為之前回落得比較多,上周五冇再大插。

出口大跌 外資腳軟

  外國投資者將中港股市大跌,歸咎於中國遠差於預期嘅出口數字。中國海關總署上周五公佈,中國2月出口按年下跌20.7%,遠差於市場預期嘅跌4.8%。出口急跌,令中國2月貿易盈餘大幅縮減至41.2億美元,遠少過市場估計嘅263.8億美元。澳盛銀行(ANZ)嘅大中華首席經濟學家Raymond Yeung話,呢個數字預視中國貿易開始出現衰退,佢認為短期內好難見到中國出口會有大幅反彈,因為環球經濟狀況唔好,令亞洲出口比較疲弱。

  外資重視中國出口數字嘅影響,但對內地股市下跌原因嘅睇法就有啲差異。雖然宏觀經濟數據,好似出口下跌會觸發市場下跌,但上周五股市跌得咁多,主要都係以下兩個因素。

  第一係「沽出」報告,中國金融業兩大龍頭中國人保同中信建投,上周先後被中信證券同華泰證券睇淡,給予「沽出」評級,令兩隻巨股上周五跌停板,拖累金融板塊大跌,牽一髮動全身。由於中國嘅證券行市場報告,特別係針對大公司,都以「買入」為主,「沽出」報告十分罕見。當出現「沽出」報告,殺傷力特別大。

  第二係官方態度似有輕微轉向,有「沽出」報告並唔不奇怪,但有官媒頭版評論話,「沽出」研究報告應該成為常態。同時亦有幾間銀行,因為違規資金流入股市被罰。3月7日銀保監會台州監管分局就因為貸款管控不嚴,處罰咗兩間銀行。當日廣東證監局召集相關證券部門負責人傾計,話證券公司唔能夠為場外配資提供便利。

官方取態 左右大市

  市場估計係由於2015年中國出現牛市時,場外配資盛行,其後股市崩潰,所以今次官方機構警告銀行唔好再支持場外配資。官媒對「沽出」報告嘅態度,同埋監管機構針對場外配資,市場視為官方希望股市降溫嘅信號,導致聰明資金馬上逃出,觸發股市大跌。

  比較經濟宏觀因素同股市微觀因素,內地股市受宏觀因素影響較少,受微觀因素較大。經濟唔好嘅時候,中央都會全力承托股市,所以出口唔得,經濟唔好,反而唔係股市大跌嘅原因,中央態度更為重要。當有好多微觀消息,令市場覺得中央對股市有戒心時,就會觸發短線資金離場。

  內地股市最近的確升得較急,由1月低位2440點,花咗兩個幾月就飆升到3129點,升幅達28.2%!股民對舊年熊市記憶猶新,一直唔敢放膽入市,見到有咩風吹草動,就急忙沽貨走人。上周五呢種一日跌4.4%嘅狀況,其實唔難理解,係升得急都跌得急,再加上人心脆弱而已。O依家真正問題係,究竟呢一輪A股牛市行情,係咪已經喺短短兩個月內玩完,未來股市又開始下滑?或抑牛市行情仲未走完,未來仲會再創新高?

  內地一啲股評家提到,內地雖然有「沽出」報告出現,但唔表示股市馬上會大跌。喺2007年3月22日,中信證券發報告強烈睇淡深發展A股,2014年6月30日,光大證券都發表針對伊利嘅沽空報告。雖然兩份報告令相關股份股價急跌,但就迎嚟2007年同2015年嘅大牛市。今次又會唔會歷史重演呢?我睇關鍵都係要分析官方態度。

  市場最大利好因素,反而係疲弱經濟。中國除咗出口數字疲弱,剛公佈嘅2月生產價格指數(PPI)都好弱。中國2月PPI按年升0.1%,低過預期嘅0.2%,上月都係升0.1%,顯示生產價格指數極為疲弱。

經濟疲弱 被迫托市

  中美貿易談判去到最後階段,但未必一定會有協議,但中國經濟數字繼續急速下滑,中央一定要全力承托經濟,承托股市,甚至穩住樓市,係承托經濟嘅重要部份。

  中央見股市近期升得太急,唔想出現瘋狂大牛市,例如場外配資太多,調控一吓都好正常。不過,當覺得股市會大跌時,相信中央不會坐以待斃,會出手扶持。新上場嘅中國證監會主席易會滿,上任唔夠一個月,內地股市回升,被視為佢嘅重要政績,如果轉眼暴挫打回原形,恐怕佢嘅官位都唔會坐得穩。

  中央唔想股市升得太急,更加唔想股市大跌,最好係股市能夠健康慢牛發展,股市升得太多就要唞一唞,之後再向上,只要股市軸線能夠維持上升,一定會對消費同投資有拉升作用。短期而言,內地科創板即將推出,如果喺大市大跌嘅一片哀嚎聲中開市,恐怕會相當諷刺。中長期而言,中央有意將中國發展成金融強國,提高全球資本市場地位,喺政策面上一定有好大支持,所以相信中央往後仲會陸續出招承托股市。

大市調整 分段低吸

  如果上述睇法正確,估計今次調整應該唔係中國股市崩潰嘅開始,即使想短炒看淡的話,等中美達成貿易協議後先睇淡都未遲。因此,今次調整反而係入市良機。如果怕有風險,可以買入大型指數股,有息收嘅會更好。進取一啲就可以分注買入華夏滬深300指數(3188),佢對內地股市走勢比較敏感,上落幅度都比較大,但要留意嘅係,收益率只有0.9厘。

  想穩陣一啲,就可以買恒生H股指數基金(2828),息口2.4厘,但對內地股市走勢冇咁敏感。短期而言,大市上周五回落,可能仲會有一浪下滑,如果想買入上述股份,應該分段去買。買指數股好處係萬一睇錯市,跌幅唔會好似個別股份咁大,仍然可以守,長線仲有機會重返家鄉。

陸羽仁

hd