金融High Tea——科網半新股有炒味

        美股雖然受波音空難影響公司股價大跌拖累,但無礙美股收升。A股開市表現不俗,滬深兩市向好。上證指數繼續攀升1.1%,連升第二日。兩市成交增至1.14萬億元人民幣。有報道指,螞蟻金服會喺內地科創板上市,創業板都受帶動,收報1773點,升逾2%。

A股造好港交所受惠

  A股好,相關概念都向好,平保(2318)升2.1%,收報82.7元;南方A50(2822)升0.9%,收報14.06元;華夏三百(3188)揚1.2%,收報44.85元;安碩A50中國(2823)升0.9%。港交所(388)建議推出A股期貨,市場認為新加坡早就推出同A股掛鈎的嘅產品,港交所未必可以競爭。陸羽仁就認為,新加坡搞同A股掛鈎嘅金融產品只係偷食,香港有近水樓台之利,加上資金、訊息流動快,若然港股推出產品,有條件後發先至。

  過往港交所冇推出A股期貨,係因為內地未認可,新加坡有理冇理就照搞。證監會主席雷添良喺北京話,幾時係合適時機正式推出A股期貨,要考慮唔同因素,包括內地係咪有相關限制要撤銷、市場係咪波動。言下之意,若然喺香港推出,就會有阿爺祝福,先天條件優勝好多。

  藉住這個消息,港交所喺除淨後,股價大升逾3%,收報277.4元。大摩就發表短炒策略報告,預期港交所喺股市成交增加下,首季表現良好,料可維持強勢。此外,港交所可能喺今年稍後時間,推出MSCI A股指數期貨,未來30日股價有至少80%機會上升。

同程貓眼唔急清倉

《華爾街日報》引述消息話,中美兩國正就貿易協議作最後階段討論。北京同意降低美國農產品、汽車、化學品,同其他貨品嘅關稅,華府就取消去年實施嘅大部份中國貨品關稅措施。內地A股續揚,帶動港股連升兩日,收報28920點,彈417點;國指則升189點,收報11466點,成交金額1090億元。騰訊(700)收升1.8%,報361元;友邦(1299)收升1.8%,報78.15元;建行(939)收升1.6%,報7.06元;三股合計貢獻恒指134點升幅。

  指數再衝29000點關口,市場風險胃納增加,部份資金流入科網股炒作,特別係部份蟹貨唔多嘅半新股,低位彈幅都幾驚人。做旅遊嘅同程藝龍(780)急升12%,收報17.4元。同程藝龍喺舊年11月上市,因為市況差申請未足額,股價插穿9.8元嘅招股價,低見8.87元,但今年市況回穩,公司股價反覆向好,累積升幅近倍。

  同程藝龍營運模式被視為相對健康,招股時口碑唔錯,但出世就遇饑荒,搞到股價破底。市況低迷嘅半新股,唔排除有強手喺低位收集博食大茶飯,若然有貨在手者,如果想食胡,都唔使太快清倉。

  另一隻騰訊(700)有份投資嘅內地互聯網娛樂服務平台貓眼娛樂(1896),噚日同樣爆升,收報17.98元,大升9%。公司年初上市,首日收報14.64元,較上市價14.8元為低,成為潛水股,重上水面就炒味轉濃。其他科網半新股如映客(3700)收飆10.6%,報1.99元;創夢天地(1119)收升6%,報6.33元。

  內地提出搞科創板,概念上對科網股有利,半新科網股部份喺市況差時招股,價格相對較平,加上獲利貨唔多,於是成為短期炒作目標。

陸羽仁

hd