金融High Tea——廠佬捱世界變歎世界

        美股上周五喺衰退陰霾下急跌一日,周一開始回穩微升0.1%。內地股市昨日繼續調整,上證指數失守3000點關口收市,收報2997,跌45點,跌幅1.5%;深成指數收報9513點,跌188點。港股威番次,跟美股回穩,唔跟A股跌。恒指收報28566點,升43點;國企指數收報11231點,跌唔夠1點,成交金額883億元。

  騰訊(700)再跌0.7%,報351.4元。據聞騰訊最大股東、南非傳媒集團Naspers擬分拆其互聯網業務,於荷蘭阿姆斯特丹上市,當中業務包括31%騰訊股權,被視為大股東再套現的負面因素。

有派送股價較穩定

  申洲國際(2313)公佈去年多賺兩成一,但高開後一度回順,不過之後再升,收升3.4%,報104.2元,為表現最佳藍籌。野村發表報告,維持給予申洲「買入」評級,目標價由原先118.5元,升至123.4元,對公司今年毛利率展望正面。康師傅(322)去年純利升35%,同時派發特別息,股價一度高見12.26元,收報12.08元,抽高7.3%。花旗認為康師傅上季業績差,故將評級由「中性」下調至「沽售」,目標價由14.01元減至10.85元;但摩通維持「增持」評級,目標價由16.5元升至16.7元。

  個市近日反覆,中環茶友就留意到有派送的股份表現較為穩定,原因相信係債息倒掛,前景未明,加上貿易談判繼續角力,資金寧願泊喺收益有保證、估值不高的股份,好似繼續有紅股派的恒基(012),同埋幾隻宣佈咗派特別息或有可能派特別息的股份,好似深國(152)同和記電訊(215)。噚日又輪到隻世界集團(713)爆升54.8%。

  先講深國,公司早前公佈,去年全年盈利42.13億元,按年增長10.37%,每股盈利2.03元,派末期息0.36元,同時會派特別股息0.7元,合共1.06元。深國本身有做物流業務,正因為咁所以喺深圳有物流園,而且仲喺前海範圍。前海現時土地日益緊絀,所以就將物流用地改為商業,成為深國最有價值的土地儲備。集團單係前海土地收益都已相當肥仔,所以過去兩年都有派特別息。深國呢幾年股價喺14至16元間上落,最近借派特別息向上突破,昨日再升2.2%,報16.62元,低買高沽又有錢落袋。

  至於世界集團爆升,主要係公司發盈喜,預期有關深圳市龍崗坪山新區地塊之城市更新項目,除稅後收益估計不少於13億元,會於2018年12月31日止年度內入帳。呢間公司中環茶友都有落注,仲曾經介紹過,當時公司披露會發展屬下廠地,當時股價曾經炒上,但因為發展需時,股價之後就沉寂,茶友當時分段食胡,沽完見低位又買回部份股份。

買廠地幾百萬變十幾億

  世界集團呢個項目,本來可以一次過賣斷給發展商,但管理層選擇共同發展,其後樓價攀升,公司賺得更多。這次公司預告收益有13億元,昨日升完55%,市值都只係4.97億元,呢個項目收益係市值嘅3倍幾,折合每股1.7元(昨日收報0.65元)。過去多年公司做廠出現虧損,但歷年就買下多幅廠房地皮用作生產。如今將部份廠地騰空,當年幾百萬買回來的土地,變成市值幾十億元的項目,公司坐地分肥都非常和味,做地產發展一鋪賺突,估計好有機會派特別息。

  集團由係咁捱世界變成歎世界,所以小股東擦定牙等開餐,股價就搶先爆上。

  內地現時做廠困難,但隨著經濟升級,珠三角特別係近東莞深圳一帶土地有價,類似世界集團的工業股仔仍然不少,有耐性收集持有,三年不發市,發市就唔止賺夠三年回報。

陸羽仁

hd