金融High Tea——回暖漸明 內房再升

        美國債息倒掛,一度引發衰退恐慌。喺震盪過後,有分析家派定心丸,話債息倒掛預示利率走向轉升為降,但未必一定等如衰退。美股上周五藉債息震一震倉後,陸羽仁周一反應係「債息交叉,股市不差」,過去兩日華爾街氣氛好轉,杜指隔晚回升140點收市。

龍湖績佳股價有反應

  美國增長放緩在所難免,利率易跌難升,利息敏感資產反而受惠,本地樓市開始有轉熱跡象。內地樓市同美息關係唔太直接,但兩會過後,大城市樓市都先後回暖。繼早前上海二手樓市交投轉活後,北京樓市都變得活躍。內媒引述統計指,北京樓市3月頭20日,有11日成交突破500套。由3月11日起,連續七日成交超過600套,3月15日超過800套,3月18日增至1024套,係春節後首次成交突破1000套。2月北京二手房價格按月增長0.2%,係北京二手房房價連續五個月下跌後首次回升,因此有人高聲話北京樓市回暖,似乎係「板上釘釘」。

  北京樓市以至全國房地產市場是否重現升勢,或者仲要睇多排數據,但股市通常係跑在現實之前,故此今年兩會後內房股轉勢明顯,昨日又有幾隻內房股創一年新高,比較大隻的有龍湖(960)。重慶大戶龍湖日前公佈全年賺162億元人民幣,按年升29%,每股盈利2.78元,派末期息0.69元。龍湖股價昨日收報28.05元,升7.7%。龍湖集團去年合同銷售2006億元人民幣,已售出但未結算合同銷售額1951億元,今年可供銷售貨值3500億元,全年銷售目標較去年增10%至2200億元。管理層按交付情況估計,未來兩至三年核心盈利應可維持20%以上增長,由於增長及派送不俗,股價有良好反應,反映市場對內房前景改觀,估值相應調高。除咗龍湖之外,世貿房地產(813)都升逾8%,收報23.95元;合景泰富(1813)升9.8%,收報9.18元。

  內房股造好,內房物管股都有景,中海物業(2669)創上市新高,收升3.4%,報3.64元,為全日高位;新城悅(1755)破頂,高見7.93元,收彈7.8%,報7.85元;永升生活(1995)尋頂,高見3.47元,收升2.2%,報3.27元。

中美談判前營造氣氛

  美股造好,A股都造好,大市輕微低開後,受A股靠穩帶動向上,恒指收報28728點,升161點;國指連跌五日後回穩,收報11305點,升73點。藍籌股長實(1113)創逾10個月高位,高見69.95元,收升2.1%,報69.9元;恒地(012)都創逾一年高位,高見48.6元,收升1.5%,報48.6元;油價回勇,中海油(883)升4%,收報14.36元,為升幅最大藍籌股。

  中美將於今日舉行新一輪貿易談判,市傳內地會大增入口豬肉示好,看來有人想放點好消息出來營造氣氛,不過買豬肉似乎不是一個關鍵突破,究竟會議點走仲未確定,後市發展可能又會跟住消息炒。

  市場熱話係國泰(293)以近50億元,向海航收購香港快運(HKExpress)全部股權,有關交易仲有法律問題未清,國泰股價曾升上今年高位,之後先升後跌,收挫2.5%,報13.34元。有批評指,快運仲蝕緊錢,用呢個價錢買太貴。蝕本生意賣幾十億元,條數的確難計,因為做本地廉航唔容易賺到幾億元,所以就算將來賺到錢,呢個收購價都係講緊好高的市盈率,正因為呢個原因,只有國泰能夠出到呢個價錢,因為國泰買起香港快運,雖然仲有其他廉航,但喺本地航線上清除最大對手,加上可以利用香港快運頂其他廉航,有利保住本身大餅,所以可以畀高溢價。呢個消息唔能夠話大好,但中長線仍屬正面。正如陸羽仁之前所言,國泰開始轉運,只係估值唔算低,所以股價只能低吸,一追就好易吃眼前虧。

陸羽仁

hd