金融High Tea——水泥股炒低估值

        外圍造好,港股開市好快衝上三萬點關,但跟住就回軟,指數一度倒跌,但下午再度回升,就算內地A股低收1點,都無阻恒指升140點,企穩喺三萬點樓上收市。

  內地股市昨日先高後低,上證指數收報3244點,微跌0.1%;深證指數收報10351點,跌0.6%,成交依然活躍,兩市合計1.07萬億元人民幣,反映投資氣氛未冷。上周中美第九輪高級別貿易磋商結束,本周會召開電話會議繼續商討,大家對達成協議充滿期待。恒指喺三萬點關有點拉鋸,最後企穩喺三萬點大關,為去年6月15日以來首次,收報30077點,升140點;國指收報11793點,升101點。大市成交連續六個交易日過千億元,報1215億元。

六藍籌跑出顯市底強

  大市喺關前稍停,最後都係靠強勢藍籌領軍,昨日就有六隻藍籌股創一年新高。萬洲(288)高見9.2元,收升2%,報9.06元;港交所(388)高見286.2元,升1.9%,收報285.4元;平保(2318)以高位收市,升1.9%,收報93元;恒地(012)高見50.75元,收升0.5%,報50.3元;港鐵(066)高見49.5元,收跌0.5%,報48.4元;創科實業(669)高見57.7元,收跌0.7%,報56.6元。

  港交所同恒地喺呢次反彈浪算係領軍股份,同息口睇跌有關。平保係去年最後回落的大股之一,今年初表現稍慢,但公佈業績後開始追回。從資金揀股顯示,投資者仲係傾向買優質股份,未轉去買落後股,這個可以視為大市估值仍然未算貴。另外,中船防務(317)與母企互換資產,股價跑出,並以全日最高位收市,報10.08元,急升12.4%,創一個月高位,由於市道好,公司有搞作就易炒上。

  資金追逐不同板塊股份,醫藥、建材股落鑊炒上。中國建材(3323)大力爆上逾7%,收報7.25元;海螺水泥(914)升近5%,收報52.1元;金隅(2009)升4%,收報3.05元。醫療、建材股造好,顯示資金喺市場滾動炒作,除了強勢大股領軍,資金喺不同板塊輪動,醫藥同建材剛好代表兩種不同投資取向,醫療係高估值類別,喺年初大市跌得緊要時大插,回落幅度較大,當指數升到咁上下,呢類大插股就會炒作一下。

  建材股去年業績不俗,報出來的盈利增長有點睇頭,好似海螺去年純利298億元人民幣,按年增88%,每股盈利5.63元,最吸引係派末期息1.69元,增加41%,小股東真係有實惠落袋。中國建材(3323)去年盈利80億元人民幣,按年增長63%,每股盈利95.6分,派末期息18分。

  由於公司曾經喺年前搞過併購,股價曾經反映利好因素,今年變成走勢落後,到昨日就出現報復式追升。

鋼鐵股可用間尺炒

  建材股有行業循環,增長過後擔心產能上升,又會進入下跌循環,所以不能有太高估值。內地力挺經濟,照計對建材需求不會太快回落,買水泥股就要博行業產能調控好壞,目前內地水泥價格有點壓力,但暫時仲未見到供應大增,由於呢個板塊估值偏低,所以資金就繼續炒住先。

  同建材股有點相似的是鋼鐵股,最大隻的鞍鋼(347)升3.5%,報6.22元;馬鋼(323)升3%,報4.19元。恒指創去年6月以來高位,鋼鐵股雖然稍為落後,但今年走勢都算唔錯。

  鞍鋼去年全年賺59.4億元,增長44%,第四季表現有點放緩,不過現時市盈率只係4.6倍,未來要睇行業產能會否快速回升。這類低估值股份有一定上升空間,適宜用間尺監控住走勢跟炒,跌破上升軌就止蝕跳車。

陸羽仁

hd