金融High Tea——港鐵地產夠食10年

        港股三萬關果然唔係咁易守得住,雖然指數曾經成功收喺關上,但就無法企穩,昨日藉內地通脹數字上升回吐,但以指數累積升幅咁大,回吐2、300點相當正常。

  國家統計局公佈,3月居民消費價格指數(CPI)上升2.3%,略低於預期,惟仍創五個月新高。市場藉通脹風險憂慮增加,促成A股跌勢加劇,上證指數失守3200點關,收報3189點,跌1.6%;深成指數跌勢更急,收報10158點,挫2.7%。其實首季內地通脹率為1.8%,仍遠低於今年約3%目標,市場話通脹若然上升,會限制中央放水能力,距離真正憂慮仲係好遠。現時全球央行都話通脹降溫,內地突然話通脹會飆升,聽落都幾離奇,甚有借勢回吐味道。

騰訊逆升撐住指數

  恒指最多插335點,見29783點全日低位,收報29839點,跌280點;國指收報11618點,跌145點,大市成交金額1198億元。若然唔係騰訊(700)逆市撐住,指數跌幅應該仲大,大市消化一日是否足夠仍待觀察。

  騰訊(700)續炒遊戲業務復甦,股價曾重越400元大關,為去年6月以來首次,其後升勢回順,收升0.7%,報391.4元,是表現最佳藍籌股;其他遊戲股即時起哄,遊萊(2022)急漲26%,收報0.36元;日前公佈入股VR開發商的雲遊控股(484),股價飆21%,收報7.45元;博雅互動(434)飆15%,收報2.27元。

  呢兩日運輸及房屋局局長陳帆上立法會,俾人質問發展商連細單位都搞招標,政府有咩回應。陳帆話相關部門正在調查中,唔排除會有檢控。發展商「擠牙膏」式賣樓,賣到連細單位都招標,之前當局毫無警覺,明顯「漏雞」。更深層次問題係政府根本無地,發展商先會「坐定粒六」慢慢賣。現時新樓來源除了官地拍賣,另一重要來源就係港鐵(066)。港鐵物業總監鄧智輝噚日透露,現時港鐵尚有約二萬個單位未投入市場,包括日出康城和黃竹坑站共6期項目,規模龐大,全面落成需時多年,會繼續按照市況,按序為日出康城餘下3期進行招標。

  佢仲話,現時有不少鐵路設施可改建為物業發展項目,例如小蠔灣已經落實城規程序,期望經過與政府討論後,可形成較大社區,提供私人甚至資助房屋單位,但未來港鐵沿線會否提供更多資助房屋則言之尚早,因為港鐵並無任何發展資助房屋經驗,將來會交由政府發展。

有二萬單位投入市場

  港鐵股價近日無懼負面消息,皆因地產副業好景。最近一次港鐵業績公佈純利160億元,當中地產部份大約有1000多個單位入帳。如果公司有二萬個單位投入市場,即係話未來仲有1.8萬個單位可以慢慢食,比全港住宅一年供應仲要多,其中唔少仲係何文田、香港仔靚樓,收入應該會陸續增加。

  如果以招標到落成計,通常要5、6年時間。現時日出康城的地盤招標,跟住應該仲有香港仔的項目可以推出,然後就係小蠔灣同其他項目名下改建項目,粗略計地產收益前前後後可以食成10年,10年之後仲有無得食,就要睇政府會唔會再開新線。

  港鐵未來招標的項目,慳慳哋應該可以玩多四、五年,數字已經比起唔少地產商家底都仲要厚,所以如果看好本地樓市,當個市調整得咁上下,應該可以諗諗搭番轉港鐵。

陸羽仁

hd