金融High Tea——「安心偷食」即炒即完

        美股繼續上升,蘋果公司與晶片公司高通的法律糾紛解決,推動納指重上8000點。港股昨日表現牛皮,收市微跌,汽車股則因憧憬中央政策出台爆升。

  雖然納指登頂,但串流娛樂供應商Netflix因盈利表現倒退下插。上周美國《紐約時報》行政總裁Mark Thompson來港,澳洲商會邀請他開壇。阿Mark係媒體管理高手,在他治下的《紐時》集團股價由8、9美元升上30美元。紐時網站以收費模式聞名,集團把紙媒與網媒並行的收費模式,成為傳媒學院研究的經典。他此行正好趕上壹傳媒(282)旗下網站大搞會員制,叫人登記先至有得睇內容,估計係為日後收費鋪路。中環茶友都有出席紐時CEO的講座取經,看看有無投資啟示。

  壹傳媒在4月中開始,把過去免費的網站開始作會員登記,昨日網站仲爆出歌星同大台藝員偷食影片,即時帶動登記數字勁升。若然學得到《紐時》嗰條網站要付費睇的道路,咁在蝕本多年暗黑隧道中的壹傳媒,豈非可以見到曙光?

  不過聽《紐時》總裁阿Mark的說法,收費道路唔易行,不是爆一、兩單熱炒新聞就得。佢舉Netflix做例,話該公司串流影片服務搵到錢,迪士尼、蘋果就紛紛加入競爭,結果必然係搶高內容成本,兼且拖低收費價錢。他又話,若然網站要收費,必須有很好內容,所以應該係加人而唔係減人,要做好內容去吸客。這是個好痛苦的過程,因為大炒舊人,改聘合適的新人在所難免。

壹傳媒股價先升急回

  聽阿Mark一夕話,就知美國媒體市場競爭正在加劇,股價曾風光一時的Netflix可能高峰已過,往後就要面臨業內巨人的不斷挑戰。借《紐約時報》老闆分析,睇本地網媒收費前景,先要擲大錢做好內容,要比免費時多好多嘢睇,同時要面對市場細小、同版權侵蝕的挑戰。好似條「安心偷食」片,外界傳聞指可能買返來的成本要六位甚至七位數字,但好快被人上載去社媒平台,跟住被廣泛流傳。所以整條熱爆花生片,距離成功的一百步,最多係行了一步。收費之路的前景仍要觀望,炒作就應該未成氣候嘞。

  不過現實上股民唔係咁理性,昨日壹傳媒股價藉「安心偷食」事件,一開市就大幅炒上22.6%,高見0.239元,好快就回落,收報0.204元,僅升4.6%,一早追入者中晒伏。看來有識計數者來個快手偷食,出貨套現,若然係咁,呢一浪炒作好有機會已經玩完。

  本周有長假,今日係最後一個交易日,大市情緒可能受啲影響,雖然A股造好,但恒指收報30124點,跌5點。國指升27點,報11848點,但個別板塊同股份表現不俗,大市成交金額1042億元。萬洲(288)收報9.25元,升5.1%,創新高。

郭台銘參選鴻騰破頂

  內地官方表示,汽車生產消費降幅有望進一步收窄,市場憧憬將有更多扶持措施出爐,汽車業有望復甦,汽車股急升。比亞迪(1211)收報59.7元,升14%;吉利(175)收報18.82元,升12.8%;廣汽(2238)收報10.4元,升10%。

  郭台銘宣佈參選台灣總統,富智康(2038)收報1.41元,升28%;鴻騰(6088)收報4.42元,升10%,創新高。

陸羽仁

hd