金融High Tea——好醫生遇冷槍

        昨日係五一黃金周假期開始,同時代表股市踏入五窮月。上月大市先升後回調,整個月計,恒指累升647點;國指累揚162點。

  四月豬肉股萬洲國際(288)表現甚佳,跑贏一眾藍籌,最後一個交易日股價繼續造好,一度升逾7%,高見9.55元,收升5.4%,報9.3元。商務部指內地豬肉價格按周升0.8%,其他豬肉股同樣回暖;中糧肉食(1610)抽高,高見3.24元,收報3.21元,仍升7.4%;卜蜂(043)升3%,報0.67元;本業做得麻麻的雨潤食品(1068)就跌5%,報1.33元。

濠賭股假前已回吐

  恒指假前周二收跌193點,報29699點;國指就跑輸大市,收跌95點,報11542點,成交金額僅739億元,創近三個月以來最低水平。黃金周前一度熱炒的濠賭股,果然出現見好就收嘅假前回吐,金沙中國(1928)收跌1.9%,報43.1元;銀娛(027)更跌逾3%,報58.65元;永利(1128)跌2.6%,報22.5元。

  假前網上流傳一份質疑平安好醫生(1833)的報告,報告認為AI問診完全是一個簡單機器人客服,誇大其詞;並且「健康360」產品實際完全依賴平安健康險線下銷售強推;集團唯一有一點價值的業務只有健康商城,但健康商城GMV和收入又被嚴重灌水。

  報告同時質疑,平安好醫生商業模式充滿疑點,並稱「通過數據造假誤導投資者,創造出高估值假象」,建議強烈賣出。報告又指,參考京東估值水平,擬採用2018年GMV約0.5倍對該集團進行估值,認為該集團市值應約115億元人民幣,目標價10.75元。平安好醫生假前收報38.4元,跌5%,市值仲有409.8億元,比個報告估值水平高得多。

  近年沽空機構活躍,好多時都打正招牌出來炮轟,增加公信力。在網上發表不具名報告,有啲似放刺客放冷槍,做法有點不負責任,但槍聲一起,大多數人反應係爭相走避,咁就會造成戲院失火,先跌5%,有自相踐踏的效應。

空軍拆穿皇帝新衣

  今次報告有幾可信?表面睇相關內容就算存在都不足為奇,好似當中質疑「健康360」係靠網下銷售強推,又指健康商城有價值,但營運數據嚴重灌水,有啲資料都可從公開資料獲得,關鍵只係點去理解。坦白講,好多新經濟公司經營都係靠包裝,好似美圖(1357)上市係靠賣手機,就算係網上做投資的眾安在線(6060),上市時盈利主要都唔係靠保險收入。新經濟股10隻有9隻係賣希望,靠市場融資去支撐。

  平安好醫生現時市值409億,基本上無盈利,報告質疑估值應該得100多億,其實大家都係靠估。網上醫療市場予人無限憧憬,誇張啲形容就係地球無限大,若然平安好醫生真係做到硬橋硬馬的實績,估值上萬億元絕不出奇,所以現在409億元的估值是否偏高,真係一個好藝術性的問題。網上流傳的報告不能肯定係流料,但就算真都只係說出好多人心中都知道皇帝其實無着衫,究竟有幾大衝擊,就要睇管理層點樣回應同市場氣氛。

  平安好醫生分拆之初,好多人都話呢個只係平保(2318)好邊緣的產品,咁都值幾百億元,本身保險業做得好又有唔少科技公司投資的平保豈不是好值錢?睇番呢一浪反彈,平保跌得遲彈得慢,但一彈力度就好強,上月高位距離歷史高價只差幾個百分點,若然好醫生被擊倒,或者平保股價都會借機消化吓。

陸羽仁

hd