金融High Tea——稀土股成投機快車

        中美貿易談判陷入僵局,向來講一套、做一套嘅美國總統特朗普一方面話同中國只有小爭執,用嚟安撫美股市場情緒,另一邊廂就同中國完全開火,先準備押後對歐洲車入口徵稅,同時放風會簽署行政命令,宣佈將美國喺「全國緊急狀態」下,禁止企業使用華為設備。雖然港股呢兩日稍為平靜,實際上係警鐘長鳴。

侵侵放股市慢性毒藥

  外電引述美國官員話,特朗普將會簽署行政命令,禁止美國企業使用可能危及國家安全的企業所製造的電訊產品,為禁止華為同美國企業做生意掃除阻礙。白宮發言人桑德斯話,華府將竭力保護美國企業,使它們避免受到外來競爭對手在通訊領域持續增加的剝削。從特朗普近期部署,減低對歐洲施壓,同時喺華為問題上準備出重手,有縮短戰線,集中向北京施壓味道。

  白宮要對付華為,是由另一條戰線增加貿易談判本錢,但亦可以話反映中美真正矛盾所在。正如陸羽仁先前所講,美國劍指中國,關鍵唔係純粹因為對華有龐大貿赤,而係在於中國賺咗大筆資金後,不斷加強經濟實力,引起美國憂慮中國威脅其全球霸主地位,所以中國科技產業,本身已經係重點打擊目標,唔會隨便放手。由此可見,兩國經濟衝突係深層次矛盾,唔係簡單嘅貿易不平衡。

  上世紀八十年代,日本企業喺汽車等重要領域超過美國,同時喺電視等消費品領先,繼而收購荷里活電影公司,最後呢啲日本企業都喺美國強逼日圓升值下一一被打殘。曾經被喻為全球最大潛力的松下電器,現在變成一家普通公司,旗下的白色家電事業三洋公司,仲賣埋畀中國公司海爾。

  喺網絡年代,日本基本上冇乜企業可以同美國一決高下。現時華為同中興,就好似當年嘅松下電器,面對美國的壓逼,北京採取同東京不同的應對方法,毫不退縮,矛盾持續。從呢個大局去睇,特朗普現時對貿談稍為寬鬆的說法,對股市可能只是慢性毒藥,雖然不會帶來劇痛,但會減低大家警覺性,若雙方唔可以快速達成協議,甚至再加關稅,加稅效果顯現出來,就逐漸削弱經濟底質。如果特朗普最後唔收手,打到底就大家攬住一齊死。

  內地股市昨日回升,上證指數收報2955點,升17點;深證指數收報9293點,升34點。港股跟隨A股回升,中段最高攀至28379點,倒升110點,不過尾市回順,最終微升6點,收報28275點;國指則升7點,報10811點。大市成交金額950億元。

騰訊大行唱好股價跌

  「股王」騰訊(700)季績表現好壞參半,大行繼續看好,但股價仍失守50天線,收報365.6元,跌2.3%。美國封殺華為,手機設備股受壓。瑞聲科技(2018)報44.65元,跌3%;舜宇光學(2382)報85.05元,跌5%;丘鈦科技(1478)報7.42元,跌2%。

  中美爭持,投資者很鬱悶,於是揀啲股份炒作。內地炒作稀土股,因為網上有言論,話稀土係反制美國王牌之一,因為稀土係手機必須材料,而且係稀缺資源。喺貿易戰中,稀土不在美國3000億美元下一輪加徵關稅清單內,本港上市嘅中國稀土(769)炒上,收0.39元,抽升25.8%。

  不過,炒稀土作為貿易武器過往都有試過,結果係高高舉起,快快放下,呢個板塊盈利長期平淡。現在大幅炒起,主要係股價低殘,所以只係可以視作一架投機快車,上完車要隨時搵位落車。

陸羽仁

hd