金融High Tea——中芯炒退市純屬誤會

  美國總統特朗普上星期話有信心會同中國傾掂貿易協議,又話華為會納入去談判範圍。

  不過,佢出口術頂番高個市後,又無乜逼切同中國談判,睇嚟佢心情相當輕鬆,呢兩日去咗日本訪問,打吓高爾夫球,又睇相撲表演,大有「你急我唔急」嘅姿態。

跟內地搭晶片股順風車

  同熟悉特朗普嘅商界名人傾起,他坦言最近美國入口商對特朗普做法有意見,但選民就相當受落。照目前發展,特朗普連任機會唔細,因此唔急於同中國達成協議,甚至最近訪問日本,雙方都擺出輕鬆架式,預告話近期唔急於有貿易協議,所以短期焦點仲係下個月特朗普會唔會同習近平見面。

  美國將貿易戰燒到去科技領域,手上有大量靚牌任打。華為創辦人任正非接受央視訪問,提到未來科技市場會唔會分裂做東西兩個陣營,佢直言唔贊成呢個做法。有人覺得任正非係正話反說,未來中國肯定減少對美國以至國際間嘅技術支援。

  內地A股昨日造好,多隻5G概念同晶片股漲停,多少都係炒中國加強自主研發概念。

  隨住美國有可能制裁嘅內地科企名單加長,相信中國投入創新技術投資會不斷增多。中國要加強扶持科企,呢個時候中芯國際(981)就宣佈同紐約證券交易所提出退市申請,連ADR都唔喺美國上市,外界自然揣測係唔係同貿易戰有關,中芯唔想美國有機會搞佢。

  但內媒就引述知情人士話,呢次申請退市原因係因為中芯ADR交易量,喺美國市場成交量非常少,加上為維持喺紐交所上市,以及喺美國證券交易會會員註冊,並遵守交易法的定期報告和相關義務等,公司要負擔重大行政負擔和成本等因素。

  中芯國際認為,公司喺香港上市為主,交易亦大多在香港公開市場,維持ADR經濟上唔太划算。公司多年前就有退市想法,今年年初已經開始啟動退市準備工作,呢個係同相關監管機構友好溝通嘅結果,呢個時候炒佢退市純屬誤會。

  宣佈退市後,中芯股價逆市造好,攀升近10%,收報9.27元,估計股價向好同A股晶片股當炒多過同退市有關。

  中芯股價去年曾見11.86元,現時仲有近兩成差距。中美兩國貿易戰對電訊產業帶來不明朗,對內地晶片行業短期係咪真係有好處?現時中港兩地晶片股熱炒,暫時似炒概念多過炒實質,中芯市盈率46倍,十幾年無派過息,所以想跟炒都要當係搭順風車。

科技板塊沙塵滾滾

  內地股市炒創科板好快進行開動測試,上證指數逼近二千九關,收報2892點,升1.4%;深證指數收報8979點,升2.3%。港股雖然曾挫248點,至27105點,創逾四個月低位,尾段受帶動回穩,走低65點,成交738億元。

  股王騰訊(700)八連跌,一度失守320元關,低見316.8元,創逾四個半月低位,收跌0.3%,收報323.8元。雖然晶片股造好,但其他科技股就無運行,騰訊同系閱文(772)股價創新低,低見29.4元,收挫7.3%,報30.4元;貓眼娛樂(1896)創上市新低,低見11.14元,收瀉9.3%,報11.54元;兌吧(1753)亦創新低,低見4.47元,但收市升0.6%,報4.75元;手遊股創夢天地(1119)挫4.6%,收報5.2元。

  手機設備股續見沽壓,舜宇(2382)降0.6%,收報67.2元;比亞迪電子(285)走低0.6%,收報10.42元。早前公佈業績的聯想(992)挫2.7%,收報5.7元,美國沙塵滾滾,科技股都驚隨時殺錯良民。

陸羽仁


hd