金融High Tea——托沽的疑惑

        美股正沉浸喺減息同貿易戰吹暖風當中,港股都跟隨外圍連彈三日,特別係本周彈得更急。由於內外政經局勢變化不定,金鐘隨時有人包圍立法會,有人擔心大戶會否玩先揚後挫,托高再沽。

二手放盤開始劈價

  大戶一向多蠱惑,尤其是現時頭號大戶特朗普,行事根本無路捉。現時他好明顯想逼中國達成協議,否則就會加壓,呢種「晒冷」式玩法,結果好難估,能夠做的就是計算風險回報率,個市低消息壞,值博率就高小小,相反彈咗上去就風險高小小,總之現時不是瞓身時候,要玩都要小注怡情。

  股市是否「托沽」,到下半個月就會逐漸明朗,但睇樓市早排炒升,現在就開始收火,無論是新盤同二手樓都傳出有撻訂,放盤開始有劈價,估計係同本地同外圍局勢動盪不安有關。陸羽仁同有份搞過房策嘅前高官傾偈,他坦言現時樓市係由期望控制,認為今明兩年,以至再長一點時間,私人樓宇供應唔係咁短缺,因為自從2014年起,土地供應開始增加,起樓周期大約係四、五年,所以去年起住宅真正供應係增加而不是減少,未來幾年基本上每年大約有兩萬個單位,所以將來無地係將來的事,未來幾年基本上係夠樓賣,市民擔心供應不足,實際問題係出在期望控制上。

  前高官話,過去政府大力催谷供應,成日將推地掛在口邊,樓價一上就出辣招,市民相信遲早都會有樓推,最重要係發展商都驚,唔敢過份囤貨居奇。但後來政府改變策略,樓價升話明不推辣招,停止推地改為搞土地大辯論,跟住覓地小組報告就大大聲話未來幾年不夠地,同時又把私營房屋比例由四成減到三成,於是市民就產生未來私樓大減印象,發展商自然食住上,加價推盤唔手軟,仲搞出中小單位都招標嚟推高價錢。由於市民形成樓價無得跌的期望,有能力的人諗住早買好過遲買,於是令需求提早出現,所以政府搞覓地小組同全面接納報告,放棄喺近郊邊緣起樓,等同自廢武功。

  他坦言,房策咁轉向真係好傷,但要留意嘅係全球前景不明朗,市民對景氣期望開始改變,中美就算能夠達成貿易協議,關係都無辦法復元,本地經濟若持續放緩,對樓市期望可能又會有變化。現代社會資訊太發達,變成預測對實際影響愈來愈大,對樓價都一樣。如果樓價指數升勢見頂,上半年強勢的地產股就未必可以維持。

港交所彈高 港鐵破頂

  內地股市高收,上證指數收報2925點,升73點,升幅2.7%;深成指數收報9037點,漲325點。港股都造好,恒指收報27789點,升210點;國企指數收報10620點,上揚93點;紅籌指數收報4364點,漲10點,成交金額916億元。藍籌股中,升得較多的有平保(2318),上揚1.8%,收報88.75元;港交所(388)受惠阿里巴巴將遞表回流,漲2.6%,收報264.8元;融創中國(1918) 急升5%,收報36.75元。

  幾隻防守股破頂,港鐵(066)高見49元,創上市新高,升1.3%。領展(823)高見99.35元,收報99.25元,升1%。粵海投資(270)一度創歷史高位,高見16.24元;收市倒跌,報16元。

  美國態度難測,資金炒反彈先炒內需板塊,於是基建股狂炒,中交建(1800)升5%,報7.36元;中國中鐵(390)大升8%,報6.22元;中鐵建(1186)升7.9%,報10.14元,內地允許把專項債券成為項目資本金,仲鼓勵金融機構融資支持,鐵路、高速公路、供電、供氣項目均符合資格,目的推動基建,大摩及花旗均唱好,花旗稱為買入良機。基建股向好,水泥股亦大受追捧,中建材(3323)升7.5%,報6.47元;海螺水泥(914)報47元,升4.6%;山水水泥(691)升5.5%,報2.89元;西部水泥(2233)收報1.13元,升6.6%。

陸羽仁

hd