金融High Tea——弱勢政府覓地難上難

        市場焦點仍然離唔開本港政局發展。但備受爭議的《逃犯條例》宣佈暫緩,其實等同撤回,但決定仍未足以平息風波,周日觸動更多市民上街。經此一役,政界普遍認為現屆政府已變跛腳鴨,今後政府施政無力,對政經局勢影響深遠。

  政府暫緩修訂《逃犯條例》,令香港避免出現更惡劣局面,政經壓力大減,股市昨日開市顯著反彈,一度升過300幾點。不過若說事件有好影響,咁就大大談不上,只能話係避免禍事,好過要一邊應對外圍不明朗,一邊後欄失火。大市早段大升後,收市升幅就收窄,只升104點收場。

暫緩修例恐施政無力

  今次修例特首受到嚴重挫折,點解會搞成呢個局面,中環茶友各有解說。有茶友話,林鄭月娥上場後,採取大和解策略,同上屆政府嘅強硬相比贏得唔少掌聲,但其實只係蜜月期,蜜月過後就要重回憂柴憂米嘅現實生活,如果以為貧賤夫妻可以日日度蜜月天天花錢,好易就搞到左支右絀,最後仲衰過開始嗰陣。

  茶友舉例,林鄭上場時最大民生問題係土地房屋不足。上屆政府博命覓地,本來略有成績,林鄭至少應該繼續走下去。可惜佢搞咗個土地大辯論出嚟,費時失事,白白浪費時間,樓價貴租金升,升斗市民早就不滿。同一時間覓地小組建議收回部份高球場,方案唔鹹唔淡,既得罪精英階層,又討好唔到市民大眾,左右唔係人。林鄭順手廢埋梁振英政府已展開嘅兩幅郊野公園邊陲土地研究,實行你贊成我就反對,唔理咁樣會扼殺快速覓地方法。覓地如是,今次修例搞出左右兩邊都唔滿意嘅局面,變成自己陷入孤立。

  現時修例用林鄭親信陳智思說法,陷入全面失敗,結果唔單止政治後果嚴重,仲會影響社會民生,最直接就係土地政策。林鄭同覓地小組搞咗場大龍鳳,收高球場係人都知只係花招,真正要做嘅係官商合作發展同「明日大嶼」填海計劃。兩個方案宣佈後民意反應都不佳,根本無法建立共識。現時政府陷入管治困難,呢啲富爭議性大計變成難以推動。官商合作仲好小小,就算合作唔成,當局鬆章容許發展商增加換地同補地價,都仲有現存機制可以做,但好似明日大嶼填海,未知前期研究上到立法會財委會會否出事,若然搞唔掂,到下屆政府會唔會繼續推就無人知。正如上屆政府話要搞新界東北開發,政府換屆後都唔係咁快手可以做到。借住港元拆息回落,地產股普遍回勇支持大市。九倉置業(1997)收揚3%,報53.45元;信置(083)升2.4%,收報12.8元;新世界(017)升2%,收報11.74元;三者包辦藍籌升幅榜頭三位。

東亞盈警累插15%

  林鄭喺修例遇到阻力後堅持去馬,認為一旦失敗就會管治困難,現在不幸一語成讖。覓地報告叫停開發邊陲地、近岸填海呢啲中期方案,集中火力做巨型填海,o依家睇又係錯着。經過呢兩場戰役,政府覓地只能講難上加難。政府無力推地,是否代表樓價有得升或地產股好?茶友就覺得係兩件事,因為樓價仲受好多因素影響,包括經濟同息口。政府管治無力,對經濟會有影響,所以覓地唔易,唔等同樓價就會大升。若然經濟大幅走弱,對所有嘢都有負面影響。

  香港一煲粥「杰撻撻」,投資者入市氣氛都偏淡,恒指收報27227點,升108點;國企指數收報10428點,升8點,成交只有669億元。大股港交所(388)繼續表現優於大市,上揚1.3%,成為資金避難所。五隻股份新貴周一獲納入國企指數成份股,安踏(2020)下滑3%,收報49.6元;龍湖(960)降2.8%,收報29.2元;碧桂園(2007)走低2%,收報11.22元;潤啤(291)跌1.4%,收報34.35元;新奧(2688)上升0.3%,收報74.35元。東亞(023)上周發盈警後跌勢未止,昨日再挫3.4%,收報21.2元,四日累插15%。

陸羽仁

hd