金融High Tea——百威效應惹短炒

  美股升上新高,阻力逐步增加,港股作為落後市場,都受觀望氣氛影響,恒指喺29000點關口有阻力,資金開始炒個別股份。

消費巨股即將登場

  今個星期市場焦點,係巨股百威亞太(1876)招股。全球啤酒市場強者愈強,大型啤酒商不斷併購,百威係龍頭之一,為咗籌集資金,百威分拆百威亞太上市。據銷售文件披露,百威亞太擬以每股40至47元招股,共發售16億股,集資介乎650至764億元。若行使超額配售權,百威亞太發售規模將增至18億股,集資額相應增至748至879億元,有望超越計劃在港第二上市的阿里巴巴,成為今年最大型新股。

  百威亞太計劃本周五開始公開招股,一手100股,入場費4747元。截至去年底,百威亞太純利14億美元,按年增長30.5%,今年首季純利為3.5億美元,按年增長1.5%。以招股價計,市盈率超過30倍。

  由於飲品業屬現金流強勁生意,加上亞太區市場潛力較佳,故此百威亞太被視為優質股份,掛牌後估計好快會打入成份股。早前習特會未明朗,令呢隻巨股上市蒙上陰影。現時形勢暫時穩定,集資大計乘勢出籠,令市況罩上一陣百威效應。通常巨股上市,包銷商都會維穩,百威香港是消費股,呢類股份都開始隱隱有啲炒味。

  近日新股上市數目甚多,表現個別發展。最嚇人是中煙香港(6055)股價急升,高見28.5元,最多單日再升43.5%,以上市價4.88元計,累積升幅達4.8倍,但近中午就急插,低見15.1元,之後反彈,收報19.18元,倒跌3%,單日波幅咁大,輸死好多人。中煙市值133億,但單日成交達33.1億,成交咁大,不排除噚日都有人派咗貨。

  煙草業被視為夕陽行業,加上招股時正值中美貿易談判低潮,大戶喺最差環境下入貨,有幾多買幾多,一早囤晒貨,於是炮製出一個新股熱話。新股先煙後酒,論市值百威係巨無霸,同中煙不可同日而語,炒供求的半新股無理性可言,但買百威呢類巨股唔同,要睇質素睇增長,呢類大股相對穩陣,但亦賺得唔多,部份人就寧願喺周邊搵相關概念股短炒。

  同啤酒股一樣,乳業股都被視為消費股,最近大行睇好內地乳業股,蒙牛(2319)、澳優(1717)雙雙創新高,兩隻股份市盈率都超過30倍,陸羽仁對高市盈率股票興趣向來一般,所以對乳業股都係短炒,博百威效益下走一轉。乳業股雖然有炒味,但呢個板塊有上下游業務,上游業務股份長期低迷,只有做品牌嘅蒙牛、澳優能夠吸引基金支持,另一隻就係雅士利(1230),雅士利市盈率比兩大巨股仲高,去到90倍,主因公司剛剛轉虧為盈,未來有機會維持較高增長。雅士利大股東係蒙牛,第二大股東係外資乳業巨企能達,所以有人覺得「小蒙牛」炒起來可能刺激一啲。

債息跌推升物業板塊

  百威效應另一隻相關股份係港交所(388),港交所基本質素唔使多講,市盈率38倍,息率2.4厘。此股估值一向貴,買落同炒債券差不多,只能取得微利。

  個股有炒作,港股大圍市況就受內地A股走勢轉弱,內地六月服務業PMI跌至四個月低位影響,全日波幅僅170點。恒指收28855點,跌20點;國指則跌58點,收報10922點。三隻藍籌股創上市新高,除蒙牛外,友邦(1299)高見86.75元,收報86.7元,升0.6%;港鐵(066)高見53.6元,收報53.4元,再升0.9%。

  另外,美國10年債息再度失守兩厘大關,一向被視為高息的地產股及收租股逆市跑出。九倉置業(1997)升2%,收報55.8元;領展(823)升2%,收報97.9元;恒地(012)升1.7%,收報44.05元。內地物管股繼續有勢,中海物業(2669)急彈7%,收報4.26元;彩生活(1778)彈5%;碧桂園服務(6098)破頂,高見19.1元,收升1.5%,報18.7元。

陸羽仁


hd