金融High Tea——政治烈火燒埋商界身

  過往港人關心經濟多過政治,講政治都係茶餘飯後食花生居多。如果認真研究政策,主要係睇對經濟有咩影響。近日本地政局急劇變化,機場變成角力場,相信好多人都估唔到。隨住本地政局高燒不退,街頭抗爭地區化同流竄速度增加,警方加強施壓,呢把火仲有燒向商界跡象,最先上身嘅似乎係英資太古系。

太古系跌幅超生意損失

  太古系喺本地政壇曾經非常活躍,喺英治時代被譽為與怡置系並肩參與管治香港嘅大集團,最為人津津樂道係當時太古大班彭勵治獲委任為政府財爺,喺1983年一手設計聯繫匯率。回歸後太古喺政治上轉趨沉寂,過往太古高層鄧蓮如曾做過行政局首席議員,即現時嘅行政會議成員,但如今已見唔到有咩人同太古系有明顯聯繫,甚至太古高層喺今屆立法會中想角逐一個席位,都失敗收場。

  雖然太古政治參與度唔高,但喺近期政治運動中率先中槍。由於屬下國泰(293)有機師被控暴動罪,加上有員工洩露警察搭國泰飛機去內地訊息,國泰被內地民航局作出嚴厲警告,稱如飛機穿越內地領空,所有航班人員名單都要內地事先批准。

  消息一出太古系股份全數受壓,風眼中心嘅國泰股價即時插穿10元,收報9.8元,跌近5%,是最先跌穿今年低位嘅百億元股份之一;同系太地(1972)更急插5%,創出一年低位,報25.65元;旗艦太古A(019)都無運行,收跌6.4%,報76.55元,成為表現最差藍籌股。

  中環茶友唔講政治對錯,只講投資,認為太古系今次捲入風眼好難避開。現時本港政局混亂,必然影響旅客來港,八月係傳統旅遊高峰期,機位一早訂滿,相對損失可控,但如果情況持續多一、兩個月,聖誕外遊預訂就展開。客戶會否避開訂購國泰機位,甚至減少外遊都成疑。另一方面,平時嘅商務客受局勢影響最直接,六月訪港旅客影響唔明顯,七月已經急插。現時海外對香港嘅報道都好混亂,唔知咩地方會出現街頭衝突,所以不但內地客,外國遊客都會避遊。

  上半年國泰做咗535億元生意,客運佔374億元,盈利13.5億元,利潤等同客運生意4%左右。由於員工支出,而成本方面飛機折舊開支大致固定,甚至燃油成本都好難大減,生意額下跌對經營影響好直接,估計今年第三季生意無望,第四季恐怕同樣唔樂觀。國泰近年股價有波幅無升幅,主要喺12元上下波動,呢個水平預測今年市盈率可能有12、3倍,反映公司盈利會有一定增長,但今年增長難望,所以股價插穿10元大關。

九置無事逆升夠神奇

  同樣情況都發生喺太地同太古之上,兩間公司主要經營寫字樓及商場,收益非常穩定,現在市面突然混亂,經濟大受影響,商場生意都差,太地股價由今年4月造出的一年高位34.65元後大跌,到昨日收市跌幅約23%,太古A跌幅亦相若。從資產同經營計,股價等同跌去幾年盈利,超過眼前盈利損失,反映市場擔心大環境同集團與內地關係轉差,影響未來發展。

  茶友話,英資作風一向圓滑同現實,股價下插有人覺得係入貨機會,只係大局未穩,好難知大市邊處係底,就算想撈底都不宜去得咁盡。

  市場轉為關注本地因素,港股早段平穩,隨著市面氣氛緊張升溫,恒指午後回軟,二萬六關得而復失,收報25824點,跌114點;國指收報9997點,升4點,成交縮減至588億元。個別股份表現明顯受政治因素影響,內企升而本地企業跌,大股騰訊(700)升0.5%,收報340元;建行(939)漲0.5%,收報5.73元;中國平安(2318)升0.5%,收報87.85元。本地業務多的滙控(005)跌1.6%,收報59.05元,見一年低位;港交所(388)跌1%,收報239.8元。

  政治敏感的地產股持續尋底,新地(016)跌1.5%,收報110.3元;新世界(017)大跌3%,報9.3元,被《環時》點名批評的九龍倉置業(1997)反而無事,神奇逆升0.7%,唔通佢真係咁叻可以免疫?

陸羽仁


hd