金融High Tea——香港黑天鵝

  港股被人打完心口打背脊,自己因為反修例風波跌完後,又輪到美股大插推低全球股市。美股杜指隔晚大跌389點,恒指一開再插,而且仲係愈跌愈多,收市跌543點,創出今年低位。港股過去一向係跟人走,今次大跌則好大理由源於自身嘅政治風險,甚至惹起全球關注,香港亂局令全世界關注會否成為全球金融市場嘅黑天鵝。

  周一美國股市跌因有點複雜,可以說是綜合性,亦即係無名腫毒,樣樣因由都有,沒有太明顯主因。當中美國債息倒掛,反映市場擔心會出現衰退是解釋之一。點解美國會衰退,有人話擔心英國硬脫歐,有人話係中美貿易談判不樂觀,甚至講到係美國總統大選前都好難寄望有協議。有人拉上香港政局,話機場運作開始異常,情況惡化落去,一旦港股停擺,有可能觸發金融危機。《CNBC》財經名嘴克萊默(Jim Cramer)預測中國會出解放軍鎮壓香港示威,亦嚇到老外腳軟。美股喺高位上升無力,本來要掉頭向下,借住遙遠東方的政治跌市回落,係低位收市,港股自然無運行。

本地薑插得特別誇張

        講到香港變成全球黑天鵝,聽落有啲誇張,搞到咁沸沸揚揚,一來係因為示威去到機場,搞到好多航班無法成行,成為國際消息,從外媒睇到流動性竄擾到處堵路,催淚彈射人集體運輸系統,畫面相當激烈,亦怕來港後路路不通;二來美英係事件中繼續唔停口,令人感覺中美關係處於冷戰,估計中美談判好極有限,於是就話黑天鵝有機會破繭而出。

        內外因素夾擊下,港股「無笪好肉」,藍籌股除咗舜宇光學(2382)外全線向下,本地薑跌得特別厲害,濠賭股銀娛(027)大插近6%;金沙(1928)插近4%;仲有係中銀香港(2388),慘錄13連跌;港鐵(066)、領展(0823)都跌2至4%,當中港鐵同領展都係有穩定收益的股份,連同其他本地公用股都失守。

        四面楚歌聲中,恒指以全日低位25281點收市,跌543點,國企指數跌151點,報9846點,成交842億元。大市大跌成交少,顯示大家都觀望唔係咁夠膽接棒。能夠喺呢佪時間造好嘅主要類別,就係亂世避風塘嘅金股好似招金(1818),逆市大升8%,創出11.28元高位,山東黃金(1787)更爆升12%,報19.8元,應了炮聲一響、黃金萬両嘅傳統智慧。

  本地薑股份大插,好多創出一年低位。這些公司香港股民較熟悉,心思思入貨者大不乏人,究竟應否行動呢?中環茶友話,個市就算幾差,前景幾不明朗,都會有人買嘢,否則唔會有成交,唔會有市價反映出嚟,可見市場有人睇淡,必然有人睇好,當中一點就係計風險回報,回報愈高,自然風險愈大,呢點應該認識。能夠承擔高風險,有機會博取高回報,能夠有呢個條件,當然係銀行有好多錢存放之人,這些人不少是熊市玩家,愛衝跌浪,好似幾年投地無發市嘅遠東發展(035)就成功偷雞,買入啟德商業地。

學遠展執平貨要識計數

        啟德商業地成交價24億元,今次唔少偷雞王都有入標,結果被遠展勝出,證明佢唔係最睇淡一個,而係淡友中最勇敢嘅一個。遠展股價喺贏出後報收3.47元,跌0.9%。

        今次塊地可以起寫字樓或酒店,但講明唔能分拆出售,相當影響短期回籠價值。外界話成交價至少比估值低一成,如果同一筆錢係股市,都差唔多買到回落幅度相約嘅股份,所以執平貨嘅機會唔只係大戶享有,散戶一樣有機會,關鍵只係口袋中有無好多銀。遠展(口依)家出手執貨,現時仍然有其他偷雞王未食到,佢哋仍然等待,或者佢哋會買得更平,亦可能最後等極都食唔到好嘢。

        市場之上唔止一個方法可以成功。死雞王係忍耐力特別高,佢哋絕對唔買貴貨,只有喺危機時出手執平貨,執到就長期持有,累積財富。其他成功嘅大財團則採取貨如輪轉嘅策略,盡量運用手頭資金走多兩轉,而唔係坐擁巨資候低吸納,呢類薄利多銷派現今就個個觀望,寧願睇清楚買貴多少好過。

陸羽仁


hd