金融High Tea——明炒訴求 暗炒貿談

  港股呆咗幾日,昨日開市造好,午後升幅擴大,收升475點。收市後港交所公佈有大動作,提出以溢價23%併購倫交所。

  大市急彈理由似乎有點莫名其妙,說法有報道指特首林鄭月娥下午見記者,估計係回應餘下四大訴求,其後消息證實係流料,成單都係假新聞。上次林鄭回應五大訴求,讓步撤回修例,當日港股升近千點,但今次假新聞出街,已經令人懷疑,因為上次見記者,各大傳統媒體包括電視台、報紙同網站都有消息,今次其他人全無動靜。五大訴求中,撤回修例只係字眼,冇乜實質效果,要讓步相對容易,但係其他四大訴求要讓步就唔同。現今社交媒體流料滿天飛,遇著呢啲敏感消息,最好都係做吓fact check(事實查核),睇番源頭網站或手機程式比較穩陣。

地產股炒房策見突破

  雖然林鄭記招係流料,但恒指冇因為消息被否認回落,指數差唔多以全日高位收市。港股藉本地政局緩和憧憬炒上,陸羽仁唔排除係另有真因,當中一個可能係偷步炒中美貿易談判進展。最近美國總統特朗普似乎有啲「躁底」,期望喺外交有點好消息。佢突然宣佈炒咗鷹派智囊博爾頓,據報係因為雙方喺伊朗同阿富汗政策上唔咬弦,不滿手下太過強硬。

  博爾頓向來係主戰派,無論對伊朗、中國都一樣,但點到火頭處處,後果之一係令特朗普外交上四面受敵,所以最近開始搞緩和。按照呢個思路,佢嘅對華態度都可能會有所軟化。

  周一時陸羽仁話收到風,中美喺互加關稅後都想重返談判桌,所以中央容許林鄭撤回修例,翌日兩國就宣佈喺十月初重開貿易談判。選擇喺十月重開談判,係中方要求美國要撤銷十月一日再加的稅,而中國願意加強打擊被濫用的神經科藥物芬太尼出口到美國,並增購數十億美元美國貨。中方將重開貿易談判日期訂喺十月後,就係要見到特朗普停加新一輪關稅。按照呢個狀況,貿談有可能向正面方向發展,港股有可能搶先炒呢個消息。如果推斷正確,指數正喺低位回升途中。

  恒指以接近全日高位收市,報27159點,升475點;國指收報10565點,升161點,成交金額895億元。國家外管局取消合格境外投資者(QFII/RQFII)投資額度限制,加上市傳政府喺解決公共房屋短缺問題上有突破,藍籌地產股長實(1113)曾創一個月高位,見57.85元,收升3%,報57.1元;新地(016)升3.2%,報117.8元;恒地(012)升4.3%,報38.8元。

  中美貿易戰緩和,資金從債市流走,美國主要年期債息回升,市場憧憬利好銀行淨利息收入,大型銀行股造好;銀行股急升,滙控(005)連日回購,股價創一個月高位,並以全日最高位收市,報60.75元,升逾3%;恒生(011)同樣創一個月高位,亦以全日最高位收市,升4.6%,報179元,為表現最佳藍籌股;中銀香港(2388)高見28.6元,收升3.7%,報28.3元;渣打 (2888)升4%,報66.95元。

港交所娶豪門要計數

  大升市中,港交所(388)先低後高,僅升0.3%,報246元。摩根士丹利發報告指,內地撤QFII銷限額,外資可繞過香港進入內地市場,不利港交所。收市後港交所(388)公佈,已向倫敦證券交易所集團(London Stock Exchange Group)董事會提議,將香港交易所及倫敦證券交易所集團兩間公司合併,擬以2045便士現金及2.495股港交所新股,置換1股倫敦交易所股份,作價較倫敦交易所周二收市價溢價23%。建議交易價格反映倫敦交易所企業價值為316億英鎊,以及去年除息、稅、折舊及攤銷前盈利(EBITDA)的30.2倍。

  港交所現在決定迎娶倫交所,好明顯係趁脫歐情況未明想執平貨。現時港交所市盈率32.8倍,今次出價算係門當戶對。不過能否成事可能仲有好多因素,由於交易所係重要金融基建,中英監管機構是否贊同這個交易?同樣,英國與歐盟鬧分手,未來英國脫歐成功,對倫敦作為金融中心地位肯定有影響。現時歐洲幾個大城市包括巴黎及法蘭克福等,都希望取代倫敦,倫交所前景不免有些陰影。

  港交所幾年前重錘出擊收購倫敦金屬交易所(LME),成功後全球金屬價格就因為中國完成高鐵主要建設而大舉放緩,港交所收購LME效果不算突出。呢次提出迎娶豪門,雖然可以滿足虛榮心,實際對前景有幾大好處,仲要認真計過數至知。

陸羽仁


hd