金融High Tea——外強己乾市 等跌買金股

        在中美互送秋波下,市場對中美談判轉趨樂觀,帶動港股上周五反覆向上,幾近觸及250天線。恒指收升265點,報27352點;國指收升95點,報10687點,但大市成交金額僅577億元,創超過兩個月低位。從成交可知,港股只是受外圍帶動,本地買盤薄弱。順帶一提,若然港股長期得500至600億元成交,港交所(388)點值32倍市盈率?所以佢玩收購倫交所沖喜吓都好正常,可惜倫交所無乜興趣同香港傾。

  若比較中港美三地股市表現,今年以來美股表現最強,再度升近六月高位,大有再創新高之勢。內地股市差過美股,比起四月近3300點高位,現價3031點,反彈高位回落的一半,比高位差7.8%,喺中美貿易戰如此衝擊下,表現尚算硬淨。

港股表現 差過A股

  喺正常情況下,港股表現會喺內地和美國中間,表現會好過內地股市。但今次唔係咁,恒指現價27352點,雖然已反彈咗幾多,但離高位尚差9.7%,主要原因係八月受本地因素影響跌得太深。

  估計未來港股表現,若外圍升,港股會打折跟;若外圍跌,港股就會跟足。未來外圍上升,主要有兩個因素,第一係環球放水;第二係中美達成貿易協議。環球放水九成會發生,中美有協議只有六、七成機會,皆因特朗普行為難測。

  現時先集中講講環球放水形態,有人形容係負利率時代全面來臨。日本一直未停止量寬放水,美國九月又可能再減息,歐洲央行上周四宣佈減息,將存款利率降至負0.5厘,創歷史新低,這是自2016年3月以來,歐洲央行首次調降歐羅區利率,並啟動每月購買200億歐羅歐債計劃。

  今年以來,全球已經有近30個經濟體相繼宣佈減息,釋放流動性刺激經濟,很多國家甚至採取「零利率」甚至「負利率」政策,歐洲存款利率減息0.1厘,進一步降至負0.5厘,即係話存錢入銀行,不但無息收,仲要倒轉頭貼0.5厘息畀銀行,此舉係進一步逼人投資,從而刺激經濟。

  今年環球經濟都在放緩,整個歐羅區2018年的經濟總量,以美元計價,和中國大約都係13.6萬億美元。德國經濟約佔歐羅區30%,是歐盟第一經濟體。德國去年經濟增速1.5%,今年第一季就降到0.4%;第二季德國經濟已係負0.1%。德國作為整個歐羅區一哥,都出現負增長,喺呢種情況下,歐洲央行只好出招。喺德國經濟中,整個外貿進出口的對外依存度,佔經濟總值達約70%,德國出口因為利率降低,幣值下跌,會有所提升。

歐洲量寬 負利率潮

  中國人民大學財政與金融學院副院長趙錫軍認為,從美國2008年次按危機後,歐洲經濟亦受拖累,後來仲有歐債危機,整個歐洲經濟整體一直不是很好。再加上最近英國脫歐帶來一系列影響,所以要減息加上量寬。對於歐羅區,這只是一劑無奈的強心針。因為前期歐洲央行已經執行多年寬鬆貨幣政策,長期的低利率甚至是負利率,都未能刺激經濟,現在都好難產生顯著效果。

債息狂跌 資產盛宴

  他認為,歐洲央行多年的超寬鬆政策,都沒有起作用,核心問題就係背後經濟結構,增長、消費及投資動力不足。這些問題很難單靠貨幣政策調整,如果要解決,歐羅區必須得從長期結構調整角度考慮問題。不過歐羅區國家咁多,要進行趙錫軍講的改革談何容易。

  你睇美國一個單一國家,核心問題係國家和個人都過度消費,政客要靠選票生存下去,搞改革難免有陣痛,喺民主國家無法承受,都係食食止痛藥就算,唔好做大手術了。

  美國截至六月底,美國政府法定債務限額為219876.81億美元,美國發行的公共債務已高達219877.06億美元,換言之,美國政府只剩下2500萬美元就到債務上限。美國1993年公債不足五萬億美元,26年增加3.4倍。理論上債發得愈多,價錢應該愈跌,但喺各國央行量寬買債下,債價急升債息急跌,美國10年債息1.9厘。美國財長努欽話,要趁低息發行50年期美國國債,以支持公共開支。

  聯儲局前主席格林斯潘表示,沒有任何辦法可以阻止美國國債跌至負利率水平。他認為債券市場正進行國際套戥活動,這會拉低長期美國國債息率,美國國債息率正往0以下進發,而且市場沒有任何屏障,可以阻止孳息率跌至負利率水平。他的意思是歐洲、日本國債利息一直向下走,資金轉買美債就會推高債價,推低美國國債債息。

  若美國10年期國債跌至負利率,這是一個驚人債券價格泡沫,恐怕最後爆破時會好得人驚,但喺爆破之前,可能仲有一場資產價格盛宴,你太早離場又會後悔不已。

  未來呢個放水潮,起碼會維持一兩年,即係話如果沒有中美貿易戰,如果沒有香港示威浪潮令經濟急滑,本來係可以放心入市炒港股的。

金股價高 候低吸納

  我一直覺得有外資大戶造咗期指好倉,炒第四季中美達成協議,點知先遇上中美反面互加關稅,再遇上香港政治事件,雙重夾擊質低港股。所以一有機會,佢哋會頂番個市上嚟,博中美有協議,炒返上三萬點食胡。

  喺未來環球放水潮中,以一年為限美股好大機會炒高,風險係唔知特朗普發的Twitter會否玩榭個市。香港股市難睇啲,可以話外圍強自己乾,唔係咁易炒,要買首選金股,次選中資股,本地股難落注。

  全球最大黃金ETF管理人道富環球稱,八月全球黃金ETF淨買入金額激增,喺大量買盤推動及避險情緒升溫下,認為黃金牛市只係剛剛開始,未來有機會重返歷史高位。(現價黃金每安士歷史高位1900美元,現價1495美元)最近避險風潮紓緩,債息回升金價回落,若然中美有協議,金價有更大回吐壓力,但喺放水潮中長線睇好,但短期會回深啲。

  買黃金ETF可買SPDR黃金ETF(2840),呢隻嘢市值3340億,係巨型黃金ETF,現價1110元,若預計黃金呢一浪會再回吐,回到50天線即1088元可吸,若穩陣啲等跌到100天線,就要等到1033元。但要記住黃金係無息貨幣,黃金ETF亦無息派,買佢只係睇個價會上。隻股股價跟金價,若然避險情緒高漲,股市跌黃金升,佢跟金價升,唔會跟股市跌,可以作為買股票對沖。

  若嫌黃金ETF波動較少無味道,金礦股係另一個選擇,但要明白佢哋上落好大,以招金(1818)為例,佢現價9.23元,今年高位係八月的11.36元,低位5.88元,上下波幅極大,而且息率得0.5厘,幾乎接近無息。佢已跌穿50天線9.6元,下一站100天線係8.5元,可以等跌近呢啲位吸納。金礦股炒味更濃,要承受到風險至好買。

陸羽仁

hd