金融High Tea——巨型新股頂住半邊天

  十一國慶假期過去,內地慶祝建國七十周年,香港則出現遍地開花的示威,更有中學生中槍一度危殆,經搶救後生命無礙。美國9月製造業數據奇差,觸發市場對經濟衰退憂慮,搞到美股隔晚顯著回吐,杜指大跌343點,收報26573點,跌幅1.3%;標普500指數跌1.2%;納指跌1.1%。喺呢個環境下,港股反應尚算溫和,恒指低開190點後,一度急插314點,低見25778點,創9月4日以來新低,其後買盤急增,收復二萬六大關,最後收報26042點,下滑49點;國指則跌18點,收報10182點,成交金額只有619億元。10月是傳統股災月,指數首日開局偏穩,投資者最重要就係量力而為。

百威美團齊齊破頂

  大市昨日走勢不弱,但個別發展味道甚濃,主要係靠內需股支持大市氣氛,快速被納入恒生綜指成份股的百威亞太(1876),上市第二日再創新高,高見29.8元,收升5.3%,報29.7元,成交金額28.66億元,僅次於榜首的騰訊;另一隻近日炒開的美團(3690)亦破頂,高見82元,收升1.8%,報81.5元,反映資金炒住一、兩隻貨源比較集中的重磅半新股頂住大市。

  另外,五谷磨房(1837)飆10%,收報1.5元;周黑鴨(1458)抽升7%,收報3.83元。服飾股千百度(1028)爆升16%,收報0.32元;達芙妮(210)彈6%,收報0.205元。雖然全港爆發衝突,但希慎(014)企穩;太地(1972)更揚2.2%,收報25.15元;有商場受影響的領展(823)亦升0.5%,收報86.9元。

  港股走勢較預期為佳,因為本地同外圍表現都唔算好,只能講係市場一早估計國慶日會發生不愉快事件,加上好多本地股已經好殘,指數靠其他股份撐住,所以喺二萬六暫時有支持。要留意嘅係,未來可能會繼續有壞消息,個市反應可能每次都唔同,好難以一次反應作準。

  股市暫時有技術性支持,但本地零售就真係慘不忍睹。政府公佈,8月本港零售總銷貨值臨時估計294億元,按年大挫23%,連續七個月下跌,而且是創有紀錄以來最大單月跌幅,較亞洲金融風暴期間在1998年9月錄得的跌幅更差。零售數據持續三個月擴大跌幅,跌幅是7月的一倍,當中珠寶首飾、鐘錶及名貴禮物銷貨值大跌47.4%,百貨公司貨品、藥物及化妝品、服裝均有約30%或以上的跌幅。8月零售按總銷貨量計按年亦跌25.3%,跌幅比七月擴大12.2個百分點。首八個月零售總銷貨值按年跌6%,總銷貨量跌6.9%。政府預料,銷售短期內持續低迷,政府會密切留意情況,以及對勞工市場及經濟影響。

  中環茶友話,零售業今年差不多無好過。去年本地經濟首季最強,然後逐季下滑,到年尾受中美貿易關係影響已呈疲態。今年第三季數字咁差,不是因為去年基數高,而是真正弱底。佢聽商界朋友估計,去到年尾好多中小企就會無法支撐,估計失業率有可能升到5%,屆時影響不但會擴散到其他層面。他說,現在好多商場因為租金包括營業額做基數,已經變相減租,有部份大場主都以提供各種補貼代替直接減租。

指數難反映本地經濟

  提供補貼主要係唔想面租下跌,影響估值或銀行借貸,其實銀行都知道,只係隻眼開隻眼閉,因為現在信貸疲弱,若然再收緊放數仲難。因為呢個原因,所以連一些民生股好似快餐業都受壓,如果到影響樓市,財富效應就會明顯好多,屆時或者公眾感受會強烈好多。

  美國同中國貿易談判,無諗過中國態度會咁強硬,現在香港出事,當然增加美國談判籌碼。茶友話,對香港經濟來說,中美關係比本港內部因素影響可能更大,因為香港內需市場相對細,好多股票主要業務唔喺香港,好似出口股就好睇中美搞成點。兩國關係差,中資股出事、出口股出事,衝擊更加全面,咁解釋咗點解雖然香港咁亂,但股市反應唔算強烈,但唔代表本地生意人無受到傷。

陸羽仁


hd