金融High Tea——零售股走在形勢之前

        美股高位徘徊,升一日跌一日,港股有樣學樣,但就在低位徘徊,暫時未能衝破27000點阻力。港股有這呢個表現可以理解,喺中美貿易戰驚濤駭浪,以及本地社會運動持續下,投資者過去一年被人大拋浪頭,股膽大大萎縮,風險胃納減弱,指數現在彈了過千點,於是大家又停一停手。

  香港喺內地冒起下,本身定位已經有點脆弱,要不斷創新保持競爭力。以本地小小人口同市場,要創新談何容易,最大資源就係同內地合作,現在中港關係搞到一塌糊塗,先不講政見,從經濟發展上,自然令人擔心走上台灣20年停滯之路。

政府救亡招唔湯唔水

  本地商業環境喺9、10月惡化,來港旅客插水,政府呢兩日出招救亡,被批評唔湯唔水,雖然係咁,旅遊零售股喺下半月似乎開始喘定,有些人開始撈底。中環茶友話,同本地需求相關的股份跌到好低殘,有分析估計11月區議會選舉進行,非建制派為免惹起市民反感,街頭衝突可能減少。雖然街頭抗爭無大台,但如果少了聲音推動,局面有可能稍為和緩,可能會有人趁空檔炒炒反彈。

  從股價睇,幾隻零售股的確由低位陸續回彈,而且有一定幅度,好似莎莎(178)早前跌到去1.62元,本周彈過上1.99元,回升幅度接近兩成,昨日收報1.94元,跌2.5%。九置(1997)低位見過40.55元,現在反彈逾一成。

  零售股喺今次社運中成為大輸家,估計未來業績絕對唔會好睇,關鍵係中長線如何,未來本地旅遊業會雨過天青,抑或從此內傷,暫時仲好難判斷,所以買零售股最好分散投資,不要集中買,揀選的公司業務最好不要集中香港。

  好似佐丹奴(709)收報2.47元,升1.2%。公司近日宣佈業績,銷售跌逾10%,當中香港同內地跌幅較勁,中東就有強勁增長。佐丹奴派成績表後股價一度反彈,目前市盈率8倍,息率13厘,當然呢啲數字參考價值好低,估計下年會嚴重走樣,盈利會跌,派息會減,兜底者是走在形勢之前,博最差情況已經出現,是否買中只能等日後揭盅。

  從短炒角度睇,茶友話10月買零售股,係博11月區選前衝突會收斂,避免選舉腰斬。佢仲留意到最近零售股會喺周五下挫,以觀望周六、日會唔會爆大鑊,所以可以挑周五或周一入貨,到周三、四出貨,炒返個三日鮮。當然政治市好難估,短炒都係博餐茶飲,旨在保持投資感覺啫。

內銀股跑贏大市

  港股跌了一日又上升,恒指收報26797點,升231點;國指收報10532點,升81點,成交金額687億元。內銀股表現標青,跑贏大市。招行(3968)急升2.8%,收報38.3元;中行(3988)升1.3%,收報3.22元。另外,滙控(005)上揚1%,收報61.85元。

  新股方面,市場消息透露,內地IP遊戲營運商中手游科技(302)公開發售錄得超購逾500倍。不過,炒首掛有所收斂。河南省駕駛培訓服務供應商向中國際(1871)收報0.87元,較招股價低32%,高位1.48元,低位0.87元。不計手續費及佣金,一手4000股蝕1640元。

  吉林省最大供熱服務供應商吉林省春城熱力(1853)H股收報2.2元,較招股價2.35元跌6%,高位2.45元,低位2.15元。不計手續費及佣金,一手2500股蝕375元。

陸羽仁

hd