金融High Tea——滙控話佢唔掂即刻插

        美股向新高進發,港股跟隨造好,噚日陸羽仁話滙控(005)業績唔掂,點知真係開口中。滙控噚日公佈第三季業績,表現出乎意料較預期遜色,加上香港開始受大環境衰退影響,拖累滙控股價逆市插2.3%,收報60.1元。

  滙控公佈第三季列帳基準除稅前利潤48.37億元美元,按年下跌18.3%,按季則跌21.9%。滙控管理層承認,收入增長前景轉弱嘅程度,比年中時嘅預測更甚,因此預期唔可以喺2020年達到有形股本回報超過11%目標。滙控同時表明如果收入環境持續惡化,可能導致今年第四季以至後續期間出現重大撥備,包括可能作出商譽減值及額外重組準備。但公司計劃維持股息,並將普通股權一級比率維持14%以上。

金蛋鵝有病礙業績

  滙控第二季業績較外界估計好,但正如陸羽仁早前講,下半年開始走樣,第三季就反映出來。管理層解釋,列帳基準除稅前利潤減少,反映收入下跌,主要由於環球資本市場業務嘅收益,因經濟持續不明朗,導致客戶交易活動減少下跌。若不計及重大項目嘅不利變動,以及不利嘅貨幣換算差額,經調整除稅前利潤按年減少12.2%,按季亦跌12.3%。第三季預期信貸損失及其他信貸減值準備變動8.83億美元,按年增80.6%,主要來自零售銀行及財富管理業務的無抵押貸款,以及英國同香港工商金融業務準備增加,並且包括一項反映香港經濟前景所作出的準備。

  滙控業績兩季之間差別咁大,除了外圍差之外,有無人為因素呢?因為上次業績仲係由準備離任嘅行政總裁范寧負責,今次就由新行政總裁祈耀年負責。范寧「被離任」有指係為華為事件孭鑊,有指係董事局不滿佢對節流唔夠強硬。雖然真正原因未公開,但從今次公佈業績,祈耀年新官上任三把火,燒得果然厲害。對業績採取批判態度之餘,仲表明要加快整頓,放棄回報偏低嘅業務,加快轉向有增長嘅領域發展。

  第三季成績表揭盅前,市場似乎已經有不良預感。先係傳出大笨象會喺北非同中東裁員,大摩上周尾又發表報告,整體唱淡銀行股,不排除大行分析員早就收到風,所以走喺前頭沽貨。銀行業績通常會走喺經濟稍後,中美貿易影響全球增長,下半年開始爆出來,香港由第三季衰退出現,同時逐步加深。香港係銀行最賺錢地區之一,生金蛋嘅鵝有病,影響點都唔會太細。

  滙控公佈季度業績後,大摩指出,滙控季度有形股本回報6.4%,雖然經調整撥備前只略低於預期,但撥備持續增加及聯營收入減少,稅前盈利遜預期,集團取消於2020年有形股本回報(ROTE)達11%的目標,重申整頓美國、歐洲及英國表現欠佳的業務,新目標將在2019年全年業績時公佈。大摩指滙控季度稅前盈利較市場預測低約9%,維持「減持」評級,目標價51元。

  高盛就認為,滙控第三季稅前盈利較預期低8%,以及較市場共識低6%,原因係投資市場欠佳,以及阿根廷嘅超級通脹,唔計呢啲因素,季度稅前盈利符合市場預期。管理層亦深明未來仲有挑戰,所以先打開口牌會維持派息。現時滙控息率近6.5厘,成為股價最主要嘅護城河。

科企表現再跑贏大市

  滙控業績唔太靚仔,大市氣氛一度受影響,恒指一度升升338點,高見27005點,下午升幅縮窄,收報26891點,升223點。內地股市全線走強,上證指數連續第二個交易日向上,收報2980點,升0.9%;深證指數收報9801點,揚1.5%,國企指數表現較佳,收報10569點,漲103點,成交金額810億元。

  科企股同汽車股跑贏大市,弱股美圖(1357)收升7.4%,報1.88元,但唔好以為已經升得好多,佢中段一度升近30%,見2.27元高位後急回,如果炒即日鮮追入摸頂都好傷。首日納入「港股通」的美團點評(3690)急升3.5%,收報93.7元;小米集團(1810)升1.4%,收報9.19元。國家主席習近平上周聲稱要加大區塊鏈發展力度,各部門自然要積極配合,推動區塊鏈概念相關股份全線飆升,桐成控股(1611)飆21%,收報4.7元;雄岸科技(1647)飆19%,收報0.51元;柏能(1263)飆11%,收報2.53元;眾安在線(6060)抽升9%,收報28.25元。

  汽車股炒行業銷售數字,長汽(2333)第三季純利大增逾五倍,獲多間大行看好,長汽股價飆高14%,收報6.23元;東風集團(489)升4%,收報7.96元;吉利(175)亦獲大行唱好,股價抽升3.5%,收報14.68元。

陸羽仁

hd