金融High Tea——唱好港鐵有玄機

  中美兩國眉來眼去,陸續放出貿易談判好消息。美國總統特朗普回應傳媒提問時話協議到達傾得成嘅陣痛期,又話留意到香港成功完成選舉,消息成為美股再創新高嘅原因之一。

高盛預測本地局勢改善

  區議會選舉後市面回復平靜,西方國家對泛民喺選舉大勝甚表滿意。按政治大棋盤推理,台灣明年一月選舉前,局勢會否真正平靜仲要觀察,不過,外資就借勢唱好。美資大行高盛就發表報告,唱好對時局相對敏感嘅港鐵(066),認為隨著香港局勢改善,預計港鐵乘客數量很快恢復,加上公司受惠於物業業務,可抵銷鐵路業務對收入帶嘅衝擊,預料今年核心收入仍有4%增長。該行假設運營明年初起回復正常化,明年核心收入料可增長15%,因此將評級上調至「買入」,目標價升4.2%至54元。港鐵股價即漲3.8%,收報45元,為表現最醒藍籌股。高盛睇好港鐵,大摩就估商場股領展(823)未來30日股價上升,領展除淨股價走高1.8%,收報81.15元,似乎外資大行都心郁郁走走短線。

  港鐵喺今次政治風波中被捲入漩渦中心,被指協助政府封殺示威者,被示威者揶揄為「黨鐵」,以此為由大肆破壞,甚至縱火焚燒。以港鐵市值幾十億元計,相關破壞財務影響暫時有限。港鐵股價今年由高位55元大幅下插,以低位43.5元計,蒸發了市值720億元,幅度約22%。這個回調的幅度和大市接近,所以港鐵表現其實不算特別差。高盛認為港鐵現在可以看好,建議買入,原因是物業收入好,只要局面回復平靜,就值得低吸,有啲撈平貨嘅味道。

  港鐵嘅質素同抗跌力毋容懷疑,今年該股本來表現強勢,6月前一直跑贏大市,直至亂局發生後先掉頭下滑,就算係咁到現在都未跌穿1年低位40元關口。高盛建議撈底,會唔會變成山埃貼士,關鍵在於亂局會否平靜落嚟。高盛有呢個睇法,會唔會已經聞到味,中美貿談可能差唔多埋門起腳?若然中美貿易協議搞定,白宮自然會喺香港局勢煞車收油,咁樣中港政府平亂嘅機會就會高番點。

美團阿里齊創新高

  當然,香港今次示威浪潮搞到咁大陣仗,除咗美國發功,台灣同本土派都係玩家,佢哋嘅取向未必同美國完全一致,高盛嘅睇法如果有代表性,相信都係反映咗美國嘅意向多啲。如果以現價港鐵距離高位仲有18%,作為一隻有質素嘅強勢股,風險唔算太大,或者呢個亦係高盛揀呢隻股嘅原因。

  收市後,政府宣佈以422億元將高鐵旁嘅西九商業地王批畀新地(016),新地喺西九本來已有ICC,今次入標財團三個,最有條件出價係新地,所以戰果屬於正常。對近日商廈市道,有大財團肯押巨資,應該都算係中性偏好的消息。

  大市噚日波幅唔大,恒指收造26954,上升40點。國指收造10620,微升2點,成交大幅縮減至757億元,恒生指數公司公佈,由於阿里巴巴(9988) 符合恒生綜合指數的快速納入指數規則要求,所以12月9日起就會「入藍」。上市翌日嘅阿里巴巴(9988) 同晉身紅底股嘅美團(3690)齊創上市新高,帶動其他科網股造好,唯獨重磅股騰訊(700) 跌0.18%,收報335元。阿里巴巴上市後翌日續創上市新高,高見195.3元,收漲3%,報193.2元,成交金額103.54億元,連續兩日位居成交榜榜首。美團高見105.5元,收高3.4%,報104.2元,成交金額38.54億元,僅次於阿里巴巴。另外,阿里健康(241) 升4.25%,收報8.59元;家鄉互動(3798)升3.4%;神州控股(861)升3.33%,收報4.03元;中手遊(302) 升2.8%。

陸羽仁


hd