金融High Tea——國泰慘勝在望

  美國通過《香港人權及民主法案》,中央事前已明言會有反制措施。噚日阿爺揭牌,停止審批美國軍艦來港,同時制裁多個美國非政府組織。中美雙方搏拳,大家各出一招,從壞嘅方面講,美軍無得來港遊玩,香港又少一筆收入。從好嘅嚟說,係美國簽咗法案但無具體懲罰,各出一招後如果鳴金收兵,可以減少對簽署中美首階段貿易協議嘅威脅。

零售數字有紀錄以來最差

  中美簽約可能受港局影響,令美股上周五低收。本周開市港股喺大跌後反彈,但升幅有限,恒指收報26444,升98點;國企指數收報10363,漲62點,成交金額671億元。

  區選過後,市場原本觀望社會是否慢慢回復平靜,但周日又見示威,有堵路同搗毀店舖。噚日政府公佈10份零售數字,大幅倒退24%,為有紀錄以來最大跌幅,商業氣氛頗為差劣。喺呢個環境下,本地兩大航空公司之一嘅港航形勢告急。空運牌照局形容港航嘅財政問題迅速惡化,對其牌照附加兩項新條件,若港航本周六限期前未能改善財政狀況,會採取進一步行動,包括考慮撤銷或暫時撤銷牌照。港航就回應,知悉空運牌照局今天對其牌照附加新條件。又指由於香港社會動盪造成旅遊需求疲弱,並繼續影響香港航空嘅業務同收入,已喺未來數個月減少運力同航班。公司正積極同股東及其他持份者溝通,以滿足空運牌照局嘅最新要求,並會繼續為顧客提供專業服務。

  睇情形,港航已送咗入深切治療室。港航近年快速冒起,一度威脅國泰(293)地位。去年起由於母公司海航資金鏈斷裂,公司陷入財政壓力,現在再來社運打擊,猶如雪上加霜,未知能否捱過冬天。空運牌照局發出最後通牒之後,旅客都會腳軟,好多人唔敢再訂港航機票,港航若無新股東短期內入股,就會好快玩完。

  港航告急,對手國泰應該成為得益者。國泰股價喺社運惡浪中上上落落,始終守住10元關口,與對手弱化不無關係。不過,港航傳出隨時停牌消息,國泰股價噚日只係微升0.02仙,報收10.48元,原因相信係短期嚟講,國泰環境都唔好過。上星期有報道引述國泰航空內部文件指,計劃將2020年運力削減1.4%,一改之前提升運力3.1%嘅計劃,呢次屬於「長時間以來嘅首次運力縮減」。

  國泰大幅削減運力,皆因面對商業環境好大挑戰。近期情況惡化,國泰必須迅速採取行動以削減運力,以其削減幅度,可見生意受損嚴重。本來,國泰高價買入嘅期油合約陸續到期,對手又財困乏力,股價理應有上升空間。現在被示威踩多一腳,好有可能踩死對手,但公司都要捱棍,只能形容為慘勝,所以投資者聽到「好消息」都唔敢太興奮。現時好多行業同公司情況或與國泰相似,若然捱過低潮,對手死咗,有可能明天會更好,但首先要今日唔死,關鍵係要先保留實力,等待黎明,咁都係現時喺股海生存嘅第一要訣。

內房股炒深圳過渡房啟動

  內地上月財新PMI好過預期,內地股市全線向上。上證指數收報2875,升0.13%;深成指數收報9605,揚0.24%。恒指高開128點後,一度擴大升幅至165點後乏力再上,收造26444,上揚98點,結束兩連跌;國指上升62點,收造10363點。大股中美團(3690)上周連續五日獲北水掃入,股價再創新高,曾高見107.4元,最後收造104.7元,上升1.45%,成交金額17.37億元。同是科網股的阿里巴巴(9988)逆市回吐1.46%收報195.5元,成交金額52.16億元,居成交榜榜首。

  個股炒作方面,凍結咗兩年嘅深汕合作區房地產市場,正式啟動過渡期商品房銷售工作,消息推動內房股跑出。融創(1918)飆7%,收報40.8元;恒大(3333)炒高6%,收報19.8元;奧園(3883)11月銷售大增近一倍,股價上揚5%,收報11.78元;潤地(1109)揚4%,收報35.3元,為最強勢藍籌股;碧桂園(2007)升2.8%,收報11.2。

  半新股快餐帝國(1843)公佈中期多賺逾5倍,資金炒上收飆87%,造0.71元,為升幅最大個股。

陸羽仁


hd