靳門抽射——美酒佳餚十周年

  好多人講人生有幾多個十年,更何況一個活動可以連續十年舉辦得有聲有色,成為香港在國際上的一大品牌盛事,難得。前晚筆者獲邀出席「2018香港美酒佳餚巡禮」十周年開幕典禮。活動由香港旅遊發展局主辦,看得出它們費盡心思、招攬不少世界美酒商戶參與,主席林建岳出錢出力,瞓身推動香港旅遊成為國際品牌,事事親力親為。筆者在開幕禮大門外眼見「岳少」雙眼通紅,以為他太感觸而落淚,原來他說只是眼乾,需要滴點眼藥水而已,不過,承認籌辦今次盛事真是很辛苦。

  大會今年是以第十年為主題,大台正宗上方掛有一個「10」字的大標記,在舞台燈光效果照耀下,顯得份外矚目及有氣勢,加上現場樂隊演奏和女高音的獨唱,令全場觀眾情緒推至最高。而另一重頭戲是一百架彩燈無人飛機在海港上空所拼砌出「W&D」、「10」生日蛋糕圖案,很有創意及心思,最重要是可以好容易拍到靚相,再放上網呃like。

  今年入場貴賓都可獲得金腳高身紅酒杯乙隻,附有酒杯保護套的手抽,以方便賓客拿著酒杯「滿場飛」。

  超過四百五十個美酒美食攤位供大家幫襯,各適其適,真是行幾粒鐘都行唔完。雖然筆者並非劉伶之輩,美酒只是淺嚐即止,但就嚐到不少美食,阿根廷牛柳更係好食到停唔到口,攤位外大排長龍。

  中環海濱位置極佳,一輪明月及繁星映照下,陣陣涼風隨來,既可欣賞璀璨的維港美景,又可與好朋友把酒言歡。真是人對、酒對、地方對,好好享受陶醉。

靳清松


hd