基金儷人——政治市自求多福

        最近筆者與一位基金經理朋友閒聊,言談間對方面有難色,一副鬱鬱不得志的面口。股市chok上chok落,被特朗普左一巴右一巴摑到面懵懵自然不在話下,原來基金朋友心底裏最抑鬱的地方,是眼見同期出道的同學早已投身保險界或者十多年前早早置業,而自己只是一個虛有其表的金融才俊而感到氣餒。

  今時今日的ibanker是否仍然值錢(或搵到錢),業界人士心知肚明,若然搵到錢,就不用又搞課程化身mentor,又或者撈過界搞棟篤笑了。望望十年前投身保險業的朋友,醒少少的早已晉身甚麼百萬圓桌,今時今日有幾多基金經理年薪過百萬呢?不做保險亦無問題,只要十年前肯買樓上車,過去十年物業升值幅度一定多於大部份打工仔升職加薪幅度。

  假如閣下身邊有朋友在十多年前已投身保險業而又早早置業,他們的身家已經遠遠超過同期的朋友。亦因如此,基金經理朋友感歎多年寒窗苦讀,左一句基本因素,右一句技術分析,到頭來敵不過中美兩個超級大國輪流玩政治市。政治市,完全無得估,要升要跌,左面睇阿爺,右面睇侵侵,最後搭一句自求多福。

  美國與伊朗近日關係緊張,油價從去年12月低位每桶約42美元,抽升至近日企穩60美元樓上,升幅高達43%。按照目前趨勢來看,油價插水的機會不大,甚有機會在60美元之上進行整固,與油價敏感度最高的中海油(883)有望整固後回升。

  中海油今年1月低位見於11.2元,後來隨大市抽升上揚,雙頂高位見於4月1日15.14元及4月9日15.12元。

  近日中海油跌至250天線後見支持,投資者可先觀察能否守住250天線,如能靠穩並待20天及50天回落形成匯聚均線的話,不妨於13元水平分段吸納,首站先試15元阻力位。

  (作者為證監會持牌人士,客戶無持有上述股份)

艾琳

hd