超人能量——飲水思源

  浸會校慶六十周年大搞活動,我都入晒腦,上星期篇稿,話民生書院校慶六十周年,喺莊大姐搞嘅飯局中,替阿叻呢個中坑能接聖火仲有得跑,我等後進,應該還有大把世界啦!

  點知,莊大姐來電,超人嗰晚係咪飲醉咗,民生書院係九十周年,唔係六十周年,比浸會大學更老資歷。

  這一期,民生校慶,活動陣容,真係拍得住我哋浸會,因為,旗手之一係金牌監製蕭潮順,他又是我的浸會同學,剛搞完浸大校慶又拍心口,搞民生校慶,他也是民生人,拉埋一班師兄師妹,有咁大搞咁大。

  校慶大排筵席,在九展筵開一百席,由民生師妹查小欣做司儀。

  另一重頭戲,係大師姐陳秋霞作曲,同師妹林志美、彭羚合唱「光與生命」,一定唱到行。呢隻金曲,返回學校拍MV,全校參與,人就有,器材點辦?

  魔童王維基,又係民生仔,王生借出器材,嗰啲器材係全港最新最靚,值成千萬,拍了二十組,連MV加特輯。

  當晚新知舊雨,共聚閒聊,莊主Adam係民生仔,最大收穫係喺學校認識老婆莊大姐,民生校長Kuby跟成班畢業同學,暢懷舊事,好似一個大家庭。

  這幾年,見到不少學校舊生,畢業多年,在社會打滾,漸有成果,簷前滴水,都好想為母校盡點綿力,不辭勞苦,無償奉獻,籌辦校慶,人能飲水思源,正是中國人美德。

林超榮

hd