超人能量——UA齊抽水

  自從發生了UA航空強行將越南、華裔、美籍、高齡醫生強行拖出機艙事件,引起軒然大波,全球華人杯葛,我喺茶餐廳就聽到兩個師奶都表示支持。

  「我支持杯葛,我以後都唔幫襯UA。」

  「車!你咪扮嘢,你有幾可搭飛機。」

  「我唔搭飛機啫,但係,我唔去UA睇戲。」

  「係喎,UA咁衰,我去第二間戲院睇。」

  師奶敵氣同仇,齊心合力結果,搞到太古城果一間UA都執笠。

  UA戲院退出太古城,只係巧合,與UA無關。不過,杯葛殺氣太大,UA戲院應該站出來表個聲明,我哋UA戲院和UA航空係完全無關,我哋保證不會發生觀眾在看戲途中被人強行拖走的暴力事件。大家放心睇好戲。

  本地都有一間UA財務,有必要出來澄清一番,劃清界線,我哋支持杯葛,但係,大家繼續幫襯我這間UA。

  正所謂,有智慧不如趁勢。真係有效,就在這一期間,美國的三角洲DELTA航空公司,就立刻出來發表聲明,萬一我的航空公司,發生乘客超載,需要抽籤落機事件,本公司賠償上限提高到九千九百美元,折合是港幣七萬大元。

  七萬大元讓一個位,這一個抽籤,都變成了抽獎。下一次搭到架飛機超載,好過買六合彩。

  所以,這一間三角洲航空公司的CEO真係好橋,借力打力,抽籤就變抽獎,把人家的壞事,變成了自己好事,DELTA航空乘機抽水,真係一個靚抽。

林超榮




hd