超人能量——堅離地起樓絕橋

  我問曾志偉,點解你咁多橋?

  佢話,因為我命苦。一個人要咁多橋,因為佢有問題,愈多問題的人,就要愈多橋。

  橋係用來解決問題。

  香港人命苦,問題多,重中之重是居住問題。解決居住問題,就係建屋,建屋就要找地。

  一找地就變了搶地,你搞郊野公園,環保人士同你死過,你搞棕地,地主同你玩嘢,填海又唔得,大家困在這裏,橋就來,換一個思考方法,建屋不一定係找地,而係找空間,有空間就可以建屋。

  空間哪裏來?在空氣裏,向往空中發展。香港工程師學會會長周明權就有條超級好橋,提議在葵涌貨櫃碼頭上蓋起屋,這,就有一大片空間,原本係空氣,你在上面一蓋,就係空間,有空間,就可以建屋。

  周會長計過,貨櫃碼頭可以建成美孚咁大個屋苑,住到十萬人,無需填海,又無搶地,之前,有人提議搬起貨櫃碼頭來建屋,現在,連搬都不用搬,又不用填海,只要好似巴士站上蓋起樓,一開工,就建現樓,鄰近市區,交通方便,仲有臨海景觀,肯定無人會抗拒。

  香港建樓係世界第一,不論山頭野嶺,石屎林中,見縫插針,好似學亞基米德話齋,給我一個「G」點,就可以舉起一幢摩天大廈。

  貨櫃碼頭上起樓,聽落空中樓閣,事實,絕對是住到十萬人的空中之樓,蓋上之閣,一條非常貼地好橋。

林超榮




hd